ചെറിയൊരു ചാറ്റൽ മഴ, ഡൽഹി വിമാനത്താവളത്തിന് ചുറ്റും വൻ ജനാവലി! പുലർച്ച മുതൽ കാത്തു നിന്ന ആരാധകരുടെ കാത്തിരിപ്പിന് വിരാമമിട്ട് ഇന്ത്യയുടെ ചുണക്കുട്ടികൾ ജന്മനാടണഞ്ഞു. സിആർപിഎഫ് തീർത്ത സുരക്ഷാ വലയത്തിലൂടെ ഇന്ത്യൻ ക്രിക്കറ്റ് ടീം താരങ്ങൾ നടന്നുനീങ്ങുമ്പോൾ ഏന്തിയും വലിഞ്ഞും നോക്കിയ ജനങ്ങൾക്കായി, രോഹിത് ശർമ്മ തന്റെ കൈകളിൽ ഇരുന്ന വിശ്വകിരീടം ഉയർത്തിപിടിച്ചു. 17 വർഷങ്ങൾക്ക് ശേഷം ടി20 ലോകകപ്പ് വീണ്ടും ഇന്ത്യയിലേക്കെത്തിയിരിക്കുന്നു! ആവേശ്വജ്ജലമായ സ്വീകരണം നൽകി ആരാധകർ ടീമിനെ വരവേറ്റു. ഇപ്പോൾ ടീമിന് പ്രൗഢഗംഭീര സ്വീകരണം നൽകിയിരിക്കുകയാണ് ഐടിസി മൗര്യ ഹോട്ടലും.
ലോകകപ്പിന്റെ മാതൃകയിലുള്ള കേക്കും, ത്രിവർണപതാകയുടെ നിറത്തിലുള്ള പാനീയങ്ങളും മധുരപലഹാരങ്ങളും മറ്റും ഒരുക്കിയാണ് താരങ്ങളെ, ഐടിസി മൗര്യ ഹോട്ടൽ മാനേജ്‌മെന്റ് വരവേറ്റത്. ഇന്ത്യൻ ടീമിന്റെ ജേഴ്‌സിയുടെ നിറമാണ് കേക്കിന് നൽകിയിരിക്കുന്നത്. ഇതിന് മുകളിലായി നിർമിച്ച ലോകകപ്പ് ചോക്ലേറ്റ് കൊണ്ട് ഉണ്ടാക്കിയതാണ്. ലോകകപ്പിന്റെ അതേ നിറവും ചോക്ലേറ്റ് ട്രോഫിക്ക് നൽകിയിട്ടുണ്ട്. ഇത് ഇന്ത്യൻ ടീമിനായി ഹോട്ടൽ നൽകുന്ന സ്വീകരണമാണെന്നും ഇതിന് ശേഷം ടീമിന് പ്രഭാതഭക്ഷണവും ഹോട്ടലിൽ ഒരുക്കിയിട്ടുണ്ടെന്നും ഐടിസി മൗര്യ ഷെഫ് ശിവനീത് പഹോജ പറഞ്ഞു.
‘ കൺഗ്രാജുലേഷൻ ബിഗ് വിന്നേഴ്‌സ്’ എന്ന് കേക്കിൽ എഴുതിയിരിക്കുന്നത് കാണാം. ഇതിൽ തന്നെ വൈറ്റ് ചോക്ലേറ്റ് കൊണ്ട് നിർമിച്ച രണ്ട് ചെറിയ ബാറ്റും ബോളുമുണ്ട്. താരങ്ങളുടെ കുടുംബാംഗങ്ങളും ഹോട്ടലിൽ എത്തിയിരുന്നു. മൗര്യ ഹോട്ടലിലെ വിശ്രമത്തിന് ശേഷം ഇന്ന് 10 മണിയോടെ താരങ്ങൾ പ്രധാനമന്ത്രിയുടെ സ്വീകരണ പരിപാടിയിലും പങ്കെടുക്കും.
