”അമിതവണ്ണം കുറയ്ക്കണമെന്ന് ആഗ്രഹമുണ്ട്. എന്നാൽ ജിമ്മിൽ പോകാൻ മടിയാ”.. ഇങ്ങനെ പറയുന്ന പലരും നമുക്കിടയിലുണ്ടായിരിക്കും. ജിമ്മിൽ പോകാനും വ്യായാമം ചെയ്യാനും മടിയുണ്ടെങ്കിലും ആഹാരം കഴിക്കാൻ ഇത്തരക്കാർക്ക് യാതൊരു മടിയുമുണ്ടായിരിക്കില്ല. എന്നാൽ പൊണ്ണത്തടി കുറയ്ക്കണമെന്ന ചിന്തയും ഇവർക്കുണ്ടായിരിക്കും. അങ്ങനെയെങ്കിൽ ഭക്ഷണം കഴിച്ച് തന്നെ തടികുറയ്ക്കാനുള്ള കാര്യങ്ങൾ പരീക്ഷിച്ചാല്ലോ? കൃത്യമായി ഒരു ഡയറ്റ് പ്ലാനുണ്ടാക്കി അമിതവണ്ണം കുറയ്ക്കാൻ ശ്രമിക്കാം. അതിനായി ഇവ ഭക്ഷണത്തിൽ ഉൾപ്പെടുത്തിക്കോളൂ.,
പാവയ്ക്ക
കയ്പ്പുള്ള ഈ പച്ചക്കറിയെ പലരും രുചിച്ചു നോക്കാൻ പോലും വരാറില്ല. എന്നാൽ അമിതഭാരം നിയന്ത്രിച്ചു നിർത്തുന്നതിൽ പാവയ്ക്കയുടെ സ്ഥാനം മുൻനിരയിലാണ്. വെറും വയറ്റിൽ രാവിലെ പാവയ്ക്കാ ജ്യൂസ് കുടിക്കുന്നത് പഞ്ചസാരയുടെ അളവ് കുറച്ചു നിർത്തി കുടവയർ കുറയ്ക്കുന്നതിന് സഹായിക്കുന്നു. പ്രമേഹം വരാനുള്ള സാധ്യതകളും ഈ പച്ചക്കറി കുറയ്ക്കുന്നു.
കാരറ്റ്
ധാരാളം പോഷക ഘടകങ്ങളടങ്ങിയ പച്ചക്കറിയാണ് കാരറ്റ്. വൈറ്റമിനുകളും ആന്റി ഓക്സിഡന്റുകളും ഇതിൽ അടങ്ങിയിട്ടുണ്ട്. രാത്രി സമയങ്ങളിൽ കാരറ്റും മറ്റ് പച്ചക്കറികളും ഉൾപ്പെടുത്തി സലാഡ് രൂപത്തിൽ മാത്രം കഴിച്ചു കിടക്കുന്നത് വിശപ്പ് നിയന്ത്രിച്ച് നിർത്തുന്നതിനും കൊഴുപ്പ് കുറയ്ക്കുന്നതിനും സഹായിക്കുന്നു.
ചീര
ഇലക്കറികൾ ഭക്ഷണത്തിൽ ഉൾപ്പെടുത്തുന്നത് പൊണ്ണത്തടി കുറയ്ക്കുന്നതിനും കാഴ്ച ശക്തി വർദ്ധിപ്പിക്കുന്നതിനും സഹായിക്കുന്നു. വിശപ്പ് നിയന്ത്രിച്ച് നിർത്തുന്നതിന് നല്ലതാണ് ചീര. തോരനായോ, കറിയായോ, സലാഡിൽ ഉൾപ്പെടുത്തിയോ ചീര കഴിക്കാം..
