ആഗോള ക്രാഷ് ടെസ്റ്റുകളിൽ മികച്ച സുരക്ഷാ റേറ്റിംഗ് നേടി സ്കോഡ കൊഡിയാക്. ഇന്ത്യയിൽ അടുത്ത വർഷം ആദ്യം പുറത്തിറങ്ങാനിരിക്കുന്ന എസ്യുവി യൂറോ എൻസിഎപി ക്രാഷ് ടെസ്റ്റിൽ 5 സ്റ്റാർ സുരക്ഷാ റേറ്റിംഗാണ് നേടിയിരിക്കുന്നത്. സ്കോഡ സൂപ്പർ ബിയും ഏറ്റവും ഉയർന്ന 5-സ്റ്റാർ സുരക്ഷാ റേറ്റിംഗുകൾ നേടിയിട്ടുണ്ട്.
MQB EVO പ്ലാറ്റ്ഫോമിൽ നിർമ്മിച്ച സ്കോഡ കൊഡിയാക് വിവിധ സുരക്ഷാ മാനദണ്ഡങ്ങളിൽ മികവ് പുലർത്തി. മുതിർന്നവരുടെ സംരക്ഷണത്തിന് 89%, കുട്ടികളുടെ സംരക്ഷണത്തിന് 83%, കാൽനട യാത്രക്കാരുടെ സംരക്ഷണത്തിന് 82%, സുരക്ഷാ സഹായ ഫീച്ചറുകൾക്ക് 78% എന്നിങ്ങനെയാണ് വാഹനം സ്കോർ ചെയ്തത്.
നിലവിൽ, ഉയർന്ന സുരക്ഷ നൽകുന്ന രണ്ട് മോഡലുകൾ സ്കോഡ ഇന്ത്യയിൽ ഇറക്കിയിട്ടുണ്ട്. കുഷാക്ക്, സ്ലാവിയ. ഇവ രണ്ടും കഴിഞ്ഞ വർഷം ഗ്ലോബൽ എൻസിഎപി ക്രാഷ് ടെസ്റ്റുകളിൽ 5 സ്റ്റാർ റേറ്റിംഗുകൾ നേടിയിരുന്നു. കൊഡിയാക് കൂടി വരുന്നതോടെ ഇന്ത്യൻ വാഹന വിപണിയിൽ സ്കോഡ പിടിമുറക്കുമെന്ന് ഉറപ്പ്.
സ്കോഡ കൊഡിയാക് 2024-ന്റെ പരീക്ഷിച്ച മോഡൽ ആഗോള വിപണികളിൽ ഇതിനകം ലഭ്യമാണ്. ഇന്ത്യയിൽ കംപ്ലീറ്റ്ലി നോക്ഡ് ഡൗൺ (സികെഡി) യൂണിറ്റായി അവതരിപ്പിക്കുമെന്ന് പ്രതീക്ഷിക്കുന്നു. 10 എയർബാഗുകൾ, ഓട്ടോണമസ് എമർജൻസി ബ്രേക്കിംഗ്, ഒരു ലെയ്ൻ അസിസ്റ്റ് സിസ്റ്റം, ഡ്രൈവർക്ക് ഉറക്കം വരുന്നുണ്ടോ എന്ന് കണ്ടെത്താനുള്ള സംവിധാനം തുടങ്ങിയ ആഗോള പതിപ്പിന്റെ അതേ സുരക്ഷാ ഫീച്ചറുകൾ ഇതിൽ ഉൾപ്പെടുത്തുമെന്ന് പ്രതീക്ഷിക്കുന്നു.
