വിവാഹവുമായി ബന്ധപ്പെട്ട് സമൂഹമാധ്യമങ്ങളിൽ പങ്കുവെച്ച കുറിപ്പിൽ വിശദീകരണവുമായി നടി ഭാമ. സ്ത്രീകൾ വിവാഹം കഴിക്കരുത് എന്ന് പറഞ്ഞിട്ടില്ലെന്നും സ്ത്രീധനം നൽകി വിവാഹം കഴിക്കരുതെന്നാണ് താൻ പറഞ്ഞതെന്നും ഭാമ പ്രതികരിച്ചു. തന്റെ പ്രതികരണം തെറ്റായ തരത്തിൽ വാർത്തകളായി പ്രചരിച്ചതിന് പിന്നാലെയാണ് നടി രംഗത്ത് വന്നത്. സമൂഹമാധ്യമങ്ങൾ വഴിയാണ് വീണ്ടും ഇക്കാര്യത്തിൽ ഭാമ പ്രതികരിച്ചിരിക്കുന്നത്.
“ഇന്നലെ ഞാൻ ഇട്ട എഴുത്തിൽ ഉദ്ദേശിച്ചത് സ്ത്രീധനം കൊടുത്തു നമ്മൾ സ്ത്രീകൾ വിവാഹം ചെയ്യേണ്ടതില്ല എന്നാണ്. അങ്ങനെ ചെയ്താൽ ഉണ്ടാവുന്ന പ്രത്യാഘാതത്തെ കുറിച്ചുമാണ് എഴുതിയത്. വിവാഹശേഷം ധനം ആവശ്യപ്പെട്ട് സ്ത്രീകൾക്ക് കൊടുക്കുന്ന സമ്മർദ്ദം, അതുമൂലം സ്വന്തം വീട്ടിൽ പേടിച്ച് കഴിയേണ്ടി വരിക. കുഞ്ഞുങ്ങൾ കൂടെ ഉണ്ടേൽ ഒരു സ്ത്രീയുടെ മാനസികാവസ്ഥ എല്ലാത്തിനും അപ്പുറമായിരിക്കും. ഇതെല്ലാമാണ് പറയാൻ ഉദ്ദേശിച്ചത്”.
“അങ്ങനെ ഒരിക്കലും വിവാഹം ചെയ്യരുത് എന്നാണ്. വിവാഹശേഷമാണേൽ സമ്മർദ്ദം സഹിച്ച് ജീവിതം തുടരാൻ എല്ലാവർക്കും സാധിക്കണമെന്നില്ല. അല്ലാതെ സ്ത്രീകൾ വിവാഹമേ ചെയ്യരുത് എന്നല്ല. എഴുതിയതിന്റെ ആശയം മനസ്സിലാകുമെന്ന് കരുതുന്നു”- ഭാമ പറഞ്ഞു.
