സിനിമാ താരങ്ങളുടെ കുട്ടിക്കാല ചിത്രങ്ങളും വീഡിയോകളും സമൂഹമാദ്ധ്യമങ്ങളിൽ ഏറെ ശ്രദ്ധേയമാകാറുണ്ട്. അത്തരത്തിൽ പുറത്തുവരുന്ന താരങ്ങളുടെ ത്രോബാക്ക് ചിത്രങ്ങൾക്കുമുണ്ട് ആരാധകർ ഏറെ. താരങ്ങളുടെ മാറ്റങ്ങൾ മനസിലാക്കി രസകരമായ അഭിപ്രായങ്ങൾ പങ്കുവക്കുന്നവരും ധാരാളമാണ്. ഇന്ന് മലയാള സിനിമാ മേഖലയി‍ൽ നിറസാന്നിധ്യമായ ഒരു താരത്തിന്റെ കുട്ടിക്കാല ചിത്രമാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്.
അമ്മയ്‌ക്കും സഹോദരിയ്‌ക്കുമൊപ്പമുള്ള അസീസ് നെടുമങ്ങാടിന്റെ ചിത്രമാണ് സോഷ്യൽ മീഡിയ ഏറ്റെടുത്തിരിക്കുന്നത്. അസീസ് തന്നെയാണ് ചിത്രം ഇൻസ്റ്റഗ്രാമിൽ പങ്കുവച്ചത്. ‘ഉമ്മ ഇത്ത പിന്നെ ഞാനും’ എന്നാണ് ബ്ലാക്ക് ആൻഡ് വൈറ്റ് ചിത്രം പങ്കുവച്ചുകൊണ്ട് താരം കുറിച്ചിരിക്കുന്നത്. ഒറ്റനോട്ടത്തിൽ അസീസാണെന്ന് കണ്ടുപിടിക്കാൻ കഴിയില്ല. ചിത്രം പുറത്തെത്തിയതിന് പിന്നാലെ രസകരമായ കമന്റുകൾ പങ്കുവച്ച് നിരവധി പേരും രംഗത്തെത്തി.
പണ്ടേ മൊഞ്ചൻ തന്നെയാണെന്നും ഇപ്പോഴും ആ നോട്ടത്തിന് ഒരു മാറ്റവുമില്ലെന്നുമുള്ള അഭിപ്രായങ്ങൾ കമന്റ് ബോക്സിൽ പ്രത്യക്ഷപ്പെട്ടു. നടൻ അശോകന്റെ ഫിഗറ് ചെയ്താണ് അസീസ് ഹാസ്യ രംഗത്ത് നിന്ന് സിനിമാ മേഖലയിലേക്ക് ചുവടുവച്ചത്. ജയസൂര്യ നായകനായ കുഞ്ഞളിയൻ എന്ന ചിത്രത്തിലൂടെ അഭിനയ രംഗത്തെത്തിയ താരം ഇതിനോടകം നിരവധി സിനിമകളിൽ അഭിനയിച്ചിട്ടുണ്ട്.
