പത്തനംതിട്ട: നടൻ മോഹൻലാലിനെതിരെ അപകീർത്തിപരമായ പരാമർശം നടത്തിയതിന് ചെകുത്താൻ എന്ന പേരിലറിയപ്പെടുന്ന യൂട്യൂബർ പൊലീസ് കസ്റ്റഡിയിൽ.’ചെകുത്താൻ’ എന്ന പേരിലറിയപ്പെടുന്ന തിരുവല്ല മഞ്ഞാടി സ്വദേശി അജു അലക്സിനെയാണ് പൊലീസ് പിടികൂടിയത്. കേസ് രജിസ്റ്റർ ചെയ്തതോടെ ഇയാളെ ഒളിവിൽ പോയിരുന്നു.
അമ്മ ജനറൽ സെക്രട്ടറിയും നടനുമായ സിദ്ദിഖിന്റെ പരാതിയിൽ തിരുവല്ല പൊലീസാണ് നടപടി സ്വീകരിച്ചത്. ഇന്ത്യൻ ടെറിട്ടോറിയൽ ആർമിയിൽ ലെഫ്റ്റനൻ്റ് കേണൽ പദവി വഹിക്കുന്ന മോഹൻലാൽ സൈനിക യൂണിഫോമിൽ വയനാട് ഉരുൾപൊട്ടൽ ദുരന്തമുണ്ടായ സ്ഥലം സന്ദർശിച്ചതിന് ചെകുത്താൻ യൂട്യൂബ് ചാനലിലൂടെ മോശം പരാമർശം നടത്തിയിരുന്നു.
സമൂഹമാദ്ധ്യമങ്ങളിലൂടെ വിദ്വേഷം ഉളവാക്കുന്ന രീതിയിലായിരുന്നു ചെകുത്താന്റെ പരാമർശമെന്ന് പൊലീസ് സ്റ്റേഷനിൽ രജിസ്റ്റർ ചെയ്ത എഫ്ഐആറിൽ പറയുന്നു. ഭാരതീയ ന്യായ സംഹിത 192,296(b) കെ.പി ആക്റ്റ് 2011 120(0) വകുപ്പുകൾ പ്രകാരമാണ് അജു അലക്സിനെതിരെ കേസ് രജിസ്റ്റർ ചെയ്തിരിക്കുന്നത്.
