യുഎസ് വൈസ് പ്രസിഡൻ്റ് കമല ഹാരിസ് പങ്കുവെച്ച ഫോട്ടോ ഇന്റർനെറ്റിൽ വൈറലാകുന്നു. അമ്മയുടെയും സഹോദരന്റെയും ഒപ്പമുള്ള തന്റെ ബാല്യകാല ഫോട്ടോയാണ് യുഎസ് വൈസ് പ്രസിഡന്റ് സമൂഹമാധ്യമങ്ങളിൽ പങ്കുവെച്ചത്. കൗമാരപ്രായത്തിൽ പണം സമ്പാദിക്കുന്നതിനായി ഫാസ്റ്റ് ഫുഡ് ശൃംഖലകളിൽ താൻ ജോലി ചെയ്തുവെന്നും അവർ വെളിപ്പെടുത്തി.
ഹൃദയസ്പർശിയായ കുറിപ്പിൽ, കുട്ടിക്കാലത്ത് താൻ വളർന്നത് ഒരു ഇടത്തരം കുടുംബത്തിലാണെന്ന് കമല ഹാരിസ് പറയുന്നു. “ഒരു വീട് സ്വന്തമായി വാങ്ങാൻ തന്റെ അമ്മ ഒരു ദശാബ്ദത്തിലേറെ പരിശ്രമിച്ചിട്ടുണ്ട്. അവസാനം ആ ദിവസം വന്നപ്പോൾ ഞാൻ ഒരു കൗമാരക്കാരിയായിരുന്നു. സ്വന്തമായി വീട് ലഭിച്ചപ്പോൾ അമ്മ എത്രത്തോളം ആവേശഭരിതയായിരുന്നുവെന്ന് എനിക്കിപ്പോഴും ഓർമയുണ്ട്”-കമല ഹാരിസ് കുറിച്ചു.
പണം സമ്പാദിക്കാൻ കോളേജിലെ മക്ഡൊണാൾഡ്സിൽ ജോലി ചെയ്ത സ്വന്തം അനുഭവവും ഹാരിസ് പങ്കുവെച്ചു. ജീവിതച്ചെലവ് ഉയരുമ്പോൾ ജീവിതം കൂടുതൽ ബുദ്ധിമുട്ടാണ്. ചെലവ് കുറയ്ക്കുന്നതിനും സാമ്പത്തിക സുരക്ഷ വർദ്ധിപ്പിക്കുന്നതിനും പ്രസിഡണ്ടായി താൻ തിരഞ്ഞെടുക്കപ്പെട്ടാൽ മുൻഗണന നൽകുമെന്നും കമല ഹാരിസ് പറഞ്ഞു. വരാനിരിക്കുന്ന അമേരിക്കൻ പ്രസിഡന്റ് തിരഞ്ഞെടുപ്പിൽ ഡെമോക്രാറ്റിക് പ്രസിഡൻ്റ് സ്ഥാനാർത്ഥിയാണ് കമല ഹാരിസ്.
