എരിവ് മാത്രമല്ല, മുളകിന് നിരവധി ഗുണങ്ങളാണുള്ളത്. ഫൈബർ, വിറ്റാമിനുകൾ, ധാതുക്കൾ എന്നിവ ധാരാളം മുളകിൽ അടങ്ങിയിരിക്കുന്നു. കലോറി കുറഞ്ഞതിനാൽ തന്നെ ശരീരഭാരം കുറയ്ക്കുന്നതിൽ മുളക് നിർണായക പങ്ക് വഹിക്കുന്നു.
മുളകിൻ്റ എരിവ് പലർക്കും അത്ര ഇഷ്ടമായെന്നിരിക്കില്ല. അത്തരക്കാർക്ക് പരീക്ഷിക്കാവുന്നതാണ് മുളകെണ്ണ അഥവാ ചില്ലി ഓയിൽ. രുചിക്കും മണത്തിനും കാഴ്ചയ്ക്കും മാത്രമായാണ് ചില്ലി ഓയിൽ ഉപയോഗിക്കുന്നതെങ്കിലും മുളകെണ്ണയ്ക്കും ഗുണങ്ങളേറെയാണ്.
ചില്ലി ഓയിലിന്റെ ഗുണങ്ങൾ
ആൻ്റിഓക്സിഡൻ്റ് ഗുണങ്ങളുള്ള കരോട്ടിനോയിഡുകളും ക്യാപ്സൈസിനോയിഡുകളും ചില്ലി ഓയിലിൽ അടങ്ങിയിരിക്കുന്നു. സമ്മർദ്ദം അകറ്റാൻ സഹായിക്കുന്ന ആൻ്റിഓക്സിഡൻ്റുകളാണ് ഇവ. ശരീരത്തിലെ കോശങ്ങളെ സംരക്ഷിക്കുന്നതിനും പ്രതിരോധ ശേഷി മെച്ചപ്പെടുത്താനും ഇത് സഹായിക്കുന്നു. ശരീരത്തിലുണ്ടാകുന്ന വീക്കം കുറയ്ക്കാനും ഹൃദയാരോഗ്യത്തിനും ചില്ലി ഓയിൽ സഹായിക്കുമെന്ന് 2022-ൽ പ്രസിദ്ധീകരിച്ച ബയോമോളിക്യൂൾസ് ജേണലിൽ പറയുന്നു. വേദന അകറ്റാൻ സഹായിക്കുന്നതാണ് ക്യാപ്സൈസിൻ. മിതമായി മുളകെണ്ണ കഴിക്കുന്നത് ദഹനം മെച്ചപ്പെടുത്തും. ക്യാപ്സൈസിൻ ആമാശയത്തെ കൂടുതൽ ദഹന ദ്രാവകങ്ങൾ ഉത്പാദിപ്പിക്കാൻ സഹായിക്കുന്നു. അതുവഴി കുടലിന്റെ ആരോഗ്യം മെച്ചപ്പെടുത്തുന്നു.
ചില്ലി ഓയിൽ എങ്ങനെ തയ്യാറാക്കാം..
വെജിറ്റബിൾ എണ്ണ- 1 കപ്പ് (സോയാബീൻ എണ്ണ, എള്ളെണ്ണ, ഒലിവ് ഓയിൽ തുടങ്ങിയവ ഉപയോഗിക്കാം)
വറ്റൽ മുളകിന്റെ അല്ലികൾ- കാൽ കപ്പ്
വെളുത്തുള്ളി- 2 അല്ലി
ഇഞ്ചി- ചെറിയ കഷ്ണം
ഉപ്പ്- ആവശ്യത്തിന്
തയ്യാറാക്കേണ്ട വിധം
ചെറുതീയിൽ സസ്യ എണ്ണ ചൂടാക്കുക. ഇതിലേക്ക് ഇഞ്ചിയും വെളുത്തുള്ളിയും ചേർത്ത് 5-7 മിനിറ്റ് വഴറ്റുക. തുടർന്ന് ചൂടാറി കഴിഞ്ഞ് കുപ്പിയിലേക്ക് ഒഴിക്കുക. ഇതിലേക്ക് മുളക് ചേർക്കുക. നന്നായി അലിഞ്ഞ് ചേർന്നതിന് ശേഷം മറ്റൊരു കുപ്പിയിലേക്ക് മാറ്റുക.
സലാഡ്, സൂപ്പ്, ന്യൂഡിൽസ്, ഫ്രൈഡ് എഗ്ഗ്സ് എന്നിവയിൽ ചേർത്ത് ചില്ലി ഓയിൽ കഴിക്കാവുന്നതാണ്. ദഹന സംബന്ധമായ പ്രശ്നങ്ങളുള്ളവർ മുളകെണ്ണ കഴിക്കുമ്പോൾ ശ്രദ്ധിക്കുക.
