തിരുവനന്തപുരം: ലൈംഗിക ആരോപണങ്ങൾ നേരിടുന്ന എംഎൽഎയും നടനുമായ മുകേഷിനെ ചലച്ചിത്ര നയരൂപീകരണ സമിതിയിൽ നിന്ന് മാറ്റിനിർത്തണമോ നിലനിർത്തണമോ എന്നത് സർക്കാരുമായി കൂടിയാലോചിച്ച് തീരുമാനിക്കുമെന്ന് ചലച്ചിത്ര നയരൂപീകരണ സമിതി അദ്ധ്യക്ഷൻ ഷാജി എൻ കരുൺ. കോൺക്ലേവിൽ നിന്നും മുകേഷിനെ മാറ്റി നിർത്തണമോ വേണ്ടയോ എന്ന കാര്യത്തിൽ തീരുമാനമെടുക്കുമെന്നും ഷാജി എൻ കരുൺ പറഞ്ഞു. ആരോപണം നേരിട്ട മുകേഷിനെ ഉൾപ്പെടുത്തികൊണ്ട് കോൺക്ലേവ് എങ്ങനെ സംഘടിപ്പിക്കുമെന്ന മാദ്ധ്യമപ്രവർത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം.
“ഡബ്ല്യൂസിസിയുമായും മറ്റ് ബന്ധപ്പെട്ട സംഘടനകളുമായും ആലോചിച്ച് തീരുമാനിക്കും. ഒരുപാട് കാര്യങ്ങൾ ഉൾപ്പെടുത്തിയാണ് കോൺക്ലേവ് നടത്തുന്നത്. എന്തെങ്കിലും പ്രശ്നങ്ങൾ നേരിടുന്നുണ്ടെങ്കിൽ പരിഹാര നടപടികൾ സ്വീകരിക്കും. വിവിധ സിനിമ സംഘടനകളുമായി വിഷയം ചർച്ച ചെയ്യും. പരാതികൾ ഉള്ളവർക്ക് തുറന്നുപറയാനുള്ള ഒരു വേദി ഉണ്ടാക്കി കൊടുക്കുകയാണ് കോൺക്ലേവിലൂടെ ഉദ്ദേശിക്കുന്നത്. എന്തെങ്കിലും പറയാനുണ്ടെങ്കിൽ അത് സ്വാതന്ത്ര്യത്തോടെ അവർക്ക് തുറന്നുപറയാനുള്ള അവസരം ഒരുക്കികൊടുക്കും”.
ദേശീയ തലത്തിലും അന്തർദേശീയ തലത്തിലുള്ള വിവരങ്ങൾ ശേഖരിച്ചാണ് സിനിമാ നയത്തിന് രൂപം നൽകുന്നത്. 1940 മുതൽ സിനിമയിൽ ഒരുപാട് ഏരിയകളുണ്ട്. വിജയിച്ച ഒരു സിനിമയ്‌ക്ക് എത്ര രൂപ ലാഭം കിട്ടിയെന്ന് വ്യക്തമായി അറിയാനാകില്ല. ഇതൊക്കെ സിനിമാ നയത്തിന്റെ ഭാഗമാണ്. ഒരുപാട് ഏരിയകർ ഉൾപ്പെടുന്നതാണ് സിനിമാ നയമെന്നും ഷാജി എൻ കരുൺ പറഞ്ഞു.
