ഓണത്തിന് വെറൈറ്റി ഭക്ഷണങ്ങൾ തയ്യാറാക്കണമെന്ന് ആഗ്രഹിക്കുന്നവരാണ് നമ്മളിൽ പലരും. ഓണത്തിന്റെ പ്രധാനിയായ പായസത്തിൽ തന്നെ നമുക്കൊരു പരീക്ഷണം നടത്താം. ഈന്തപ്പഴം ഉപയോഗിച്ച് എളുപ്പത്തിൽ ഒരു പായസം തയ്യാറാക്കാം. അട,കടല,സേമിയ,പയറ് തുടങ്ങിയ പതിവ് ക്ലീഷേകളെ പൊളിച്ച് പുതിയൊരു രുചി നാവിനെ പരിചയപ്പെടുത്താം. ഈന്തപ്പഴ പായസം തയ്യാറാക്കുന്നത് എങ്ങനെയെന്ന് നോക്കാം.
പായസത്തിന് ആവശ്യമായ ചേരുവകൾ
ചെറുപയർ -ഒന്നര കപ്പ്
ഈന്തപ്പഴം- 15 എണ്ണം
വെള്ളം- 3 കപ്പ്
ശർക്കര- 350 ഗ്രാം
നെയ്യ്- ഒരു ടീസ്പൂൺ
ഒന്നാം പാൽ- മൂന്നര കപ്പ്
രണ്ടാം പാൽ – രണ്ടര കപ്പ്
ഏലയ്ക്കാപ്പൊടി- അര സ്പൂൺ
ഉപ്പ്- ഒരു നുള്ള്
കശുവണ്ടി, കിസ്മിസ്, തേങ്ങാക്കൊത്ത് എന്നിവ ആവശ്യത്തിന്
തയ്യാറാക്കുന്ന വിധം
ആദ്യം ചെറുപയർ നന്നായി കഴുകിയെടുത്ത ശേഷം കുക്കറിലേക്കിട്ട് ഒന്നര കപ്പ് വെള്ളമൊഴിച്ച് വേവിച്ചെടുക്കാം. ഏഴാമത്തെ വിസിലാണ് കണക്ക്. വേവുന്നിടത്തോളം പായസത്തിന്റെ രുചിയും കൂടും. പിന്നീട് ശർക്കര ഒരു കപ്പ് വെള്ളത്തിലിട്ട് അലിയിച്ചെടുക്കണം. അതേസമയം തന്നെ, ഈന്തപ്പഴം മറ്റൊരു പാത്രത്തിലിട്ട് വെള്ളമൊഴിച്ച് കുതിർത്തെടുക്കാവുന്നതാണ്. 10 മിനിറ്റോ കൂടുതൽ നേരമോ വെള്ളത്തിലിട്ട് കുതിർക്കണം.
കുതിർന്ന ഈന്തപ്പഴം മിക്സിയിൽ നല്ലത് പോലെ അരച്ചെടുക്കണം. വേവിച്ചുവച്ചിരിക്കുന്ന ചെറുപയർ മറ്റൊരു പാത്രത്തിലേക്ക് മാറ്റാം. ഇതിലേക്ക് ഉരുക്കിവച്ചിരിക്കുന്ന ശർക്കര പാനീയം അരിച്ച് ഒഴിക്കണം. ഒരു സ്പൂൺ നെയ്യ് കൂടി ചേർത്തശേഷം ശർക്കര പാനീയത്തിൽ ചെറുപയർ കുറുക്കിയെടുക്കണം.
ശർക്കര പാനീയത്തിൽ കുറുകിയ ചെറുപയറിലേക്ക് രണ്ടാം പാൽ ഒഴിച്ചുകൊടുക്കുക. ഇതിലേക്ക് ഒരു നുള്ള് ഒപ്പ് ഇടുന്നത് നന്നായിരിക്കും. ഇത് കട്ടിയായി വരുമ്പോൾ ഈന്തപ്പഴം അരച്ചുവച്ചിരിക്കുന്നത് ചേർത്ത് ഇളക്കാം. ശേഷം ഏലയ്ക്കാപ്പൊടി ചേർക്കണം. തുടർന്ന് ഇതിലേക്ക് ഒന്നാം പാൽ ചേർത്ത് രണ്ട് മിനിറ്റ് തിളിപ്പിക്കുക. മറ്റൊരു പാനിൽ നെയ്യൊഴിച്ച് കശുവണ്ടി, കിസ്മിസ്, തേങ്ങാക്കൊത്ത് എന്നിവ വറുത്ത് എടുക്കാം. ഇത് പായസത്തിലേക്കിട്ട് ഇളക്കി കൊടുത്താൽ ഈന്തപ്പഴ പായസം തയ്യാർ.
