ഹെെദരാബാദ്: ദക്ഷിണേന്ത്യൻ നൃത്ത സംവിധായകൻ ലെെംഗികാതിക്രമ ആരോപണവുമായി സഹപ്രവർത്തക രംഗത്തെത്തി. വിവിധ ലൊക്കേഷനുകളിൽ വെച്ച് പലതവണ ലൈംഗികാതിക്രമത്തിനിരയാക്കി എന്നാണ് പരാതി. ഡാൻസ് കോറിയോഗ്രാഫറായ 21 കാരിയാണ് ഷെയ്ക് ജാനി ബാഷ എന്ന ജാനി മാസ്റ്ററിനെതിരെ പോലീസിൽ പരാതി നൽകിയത്. യുവതിയുടെ പരാതിയിൽ റായ്ദുർഗ് പോലീസ് എഫ്.ഐ.ആർ രേഖപ്പെടുത്തി.
കൂടുതൽ അന്വേഷണത്തിനായി കേസ് നർസിംഗി പോലീസ് സ്റ്റേഷനിലേക്ക് മാറ്റിയതായി ഇൻസ്പെക്ടർ വെങ്കണ്ണ സ്ഥിരീകരിച്ചു. പരാതിക്കാരി നർസിംഗിയിൽ താമസിക്കുന്നതിനാലാണ് കേസ് നർസിംഗി പോലീസിന് കൈമാറിയത്.
ജാനി മാസ്റ്റർ തന്നെ ദീർഘകാലമായി ലൈംഗികമായി പീഡിപ്പിച്ചുവെന്ന് പരാതിക്കാരിയായ വനിതാ കൊറിയോഗ്രാഫർ ആരോപിച്ചു. ചെന്നൈ, മുംബൈ, ഹൈദരാബാദ്, അളകാപുരി ടൗൺഷിപ്പ് എന്നിവയുൾപ്പെടെ വിവിധ നഗരങ്ങളിൽ നടന്ന പീഡനത്തിന്റെയും ആക്രമണത്തിന്റെയും സംഭവങ്ങൾ പരാതിയിൽ അവർ വിശദമാക്കിയിട്ടുണ്ട്. യുവതിയുടെ നർസിംഗിയിലുള്ള വസതിയിൽ വെച്ചും പലതവണ പീഡിപ്പിച്ചിട്ടുണ്ടെന്നും പരാതിയിലുണ്ട്.
ജാനി മാസ്റ്ററിന് എതിരെ നേരത്തെയും പരാതികൾ ഉണ്ടായിട്ടുണ്ട്. ജാനി മാസ്റ്റർ തന്നെ ഉപദ്രവിച്ചു എന്നാരോപിച്ച് നർത്തകനായ സതീഷ് പോലീസിൽ പരാതിപ്പെട്ടിരുന്നു.2019-ൽ ഹൈദരാബാദ് മെഡ്ചലിലെ ഒരു പ്രാദേശിക കോടതി ജാനി മാസ്റ്ററെ ആറ് മാസത്തെ തടവിന് ശിക്ഷിച്ചിരുന്നു.
