മിക്കവർക്കും പാമ്പ് എന്ന് കേട്ടാൽ തന്നെ ഭയമാണ്. പലരുടെയും പേടിസ്വപ്നം കൂടിയാണ് പാമ്പ്. ഇന്ത്യയിൽ വിവിധയിനം പാമ്പുകൾ ഉണ്ട്. ചിലത് ചില പ്രദേശങ്ങളിൽ മാത്രം കാണപ്പെടുന്നു. അത്തരത്തിൽ ഉത്തരേന്ത്യയിൽ കാണപ്പെടുന്ന ഒരു വിഷ പാമ്പുണ്ട്. കറുപ്പും മഞ്ഞയും കലർന്ന Banded krait. ഉത്തരേന്ത്യക്കാരുടെ രാജസർപ്പം എന്നറിയപ്പെടുന്ന ഒരു വിഷപ്പാമ്പാണ് മഞ്ഞവരയൻ(Banded krait).
ഇന്ത്യൻ ഉപഭൂഖണ്ഡങ്ങളിലും തെക്കുകിഴക്കൻ ഏഷ്യൻ രാജ്യങ്ങിലുമാണ് ഇവ പൊതുവേ കാണപ്പെടുന്നത്. തെക്കൻ ചൈന, ഇന്തോനീഷ്യ എന്നിവിടങ്ങളിലും ഇന്ത്യയിൽ മിസ്സോറാം, അസ്സം, ത്രിപുര എന്നിവിടങ്ങളിലും ഇവയെ ധാരളമായി കണ്ടുവരുന്നു. ചെറിയ പാമ്പുകളും എലികളുമാണ് ഇവയുടെ പ്രധാന ഭക്ഷണം. ഇവയുടെ കടിയേറ്റുള്ള മരണങ്ങൾ കുറവാണ്. എന്നിരുന്നാലും വീര്യമുള്ള വിഷ പാമ്പുകളിൽ ഒന്നാണ് മഞ്ഞവരയൻ.
സാധാരണയായി മഞ്ഞവരയന് കണ്ട് വരുന്ന നീളം 1.8 മീ (5 അടി 11 ഇഞ്ച്) ആണ്. എന്നാൽ 2.7 മീറ്റർ (8 അടി 10 ഇഞ്ച്) നീളമുള്ള പാമ്പിനെയും കണ്ടെത്തിയിട്ടുണ്ട്. ശരീരം മഞ്ഞ വരകൾ വളയം പോലെ കാണാം. സ്വർണ്ണം എന്നർഥമുള്ള ബംഗാരം എന്ന തെലുങ്ക് പദത്തിൽ നിന്നാണ് ഈ ജനുസ്സിലെ ശാസ്ത്രീയ നാമം ഉരുത്തിരിഞ്ഞത്.
അപൂർവമായി കേരളത്തിലും മഞ്ഞവരയനെ കണ്ടെത്തിയിട്ടുണ്ട്. കൊല്ലം ജില്ലയിൽ നിന്ന് ഈ പാമ്പിനെ 2020ൽ ലഭിക്കുകയുണ്ടായി. ഇതിനു മുൻപ് 2013ൽ ഇതിനെ മലപ്പുറം ജില്ലയിലും കണ്ടെത്തിയിട്ടുണ്ട്. അന്യസംസ്ഥാനങ്ങളിൽ നിന്നും വരുന്ന വാഹനങ്ങളിൽ കേരളത്തിൽ എത്തിയതാവാം ഈ പാമ്പുകൾ.
മഞ്ഞവരയന്റെ കടിയേറ്റാൽ ഛർദ്ദി, വയറുവേദന, വയറിളക്കം, തലകറക്കം എന്നിവയാണ് ലക്ഷണങ്ങൾ. കൃത്യമായി ചിന്തിച്ചില്ലെങ്കിൽ ശ്വാസകോശ സംബന്ധമായ തകരാറിന് കാരണമാവും. ശ്വാസംമുട്ടൽ മൂലം മരണം വരെ സംഭവിക്കുകയും ചെയ്യും.
