വ്യത്യസ്ത തരത്തിലുള്ള നിരവധി കടൽ മത്സ്യങ്ങളുണ്ട്. അവയിൽ പലതും കാഴ്ചയിൽ സുന്ദരമാണെങ്കിലും വളരെ അപകടകാരികളാണ്. അത്തരത്തിൽ ഒരു ജീവിയാണ് ഉഷ്ണമേഖലാ ഇൻഡോ-പസഫിക്കിലെ ആഴം കുറഞ്ഞ ജലാശയങ്ങളിൽ കാണപ്പെടുന്ന Synanceja ജനുസ്സിലും Synancejidae കുടുംബത്തിലും വർഗ്ഗീകരിച്ചിരിക്കുന്ന വിഷമുള്ള കടൽ മത്സ്യമായ സ്റ്റോൺഫിഷ്.
പാറകൾക്കും പവിഴങ്ങൾക്കും ഇടയിലും ചെളിക്കുഴികളിലും അഴിമുഖങ്ങളിലും വസിക്കുന്ന മന്ദഗതിയിൽ സഞ്ചരിക്കുന്ന ഒരു മത്സ്യമാണ് സ്റ്റോൺ ഫിഷ്. കണ്ടാൽ കല്ല് പോലെ തോന്നുന്നതിനാലാണ് ഇവയ്ക്ക് സ്റ്റോൺ ഫിഷ് എന്ന് പേര് വന്നത്. കടലിന്റെ അടിത്തട്ടിൽ വസിക്കുന്ന മത്സ്യങ്ങളാണിവ. വലിയ തലകളും വായകളും, ചെറിയ കണ്ണുകളും കല്ല് പോലെയുള്ള ചർമ്മവുമുള്ള മത്സ്യം. ഇവയുടെ തൊലിക്ക് നല്ല കട്ടിയുമാണ്.
അവയുടെ ചുറ്റുപാടുമായി രൂപത്തിലും നിറത്തിലും ഏതാണ്ട് കൃത്യമായി ഇണങ്ങി, ചലിക്കാതെ കടലിന്റെ അടിയിൽ വിശ്രമിക്കുന്നു. ഇവ അപകടകരമായ മത്സ്യങ്ങളാണ്. പെട്ടന്ന് തിരിച്ചറിയുക പ്രയാസവും മാണ്. അതിനാൽ തന്നെ കടലിൽ ഇറങ്ങുന്നവർ കാല് കുത്തുന്നത് ഒരു പക്ഷെ ഇവയുടെ ശരീരത്തിലാകാം. ഇത് വലിയ അപകടത്തിൽ കൊണ്ടെത്തിക്കും.
ഡോർസൽ-ഫിൻ മുള്ളുകളിലെ ചാലിലൂടെ വിഷം കുത്തിവയ്ക്കാൻ ഈ മത്സ്യത്തിന് കഴിയും. ഈ മത്സ്യങ്ങൾ ഉണ്ടാക്കുന്ന മുറിവുകൾ വളരെ വേദനാജനകവും ചിലപ്പോൾ മാരകവുമാണ്. ലോകത്തിലെ അറിയപ്പെടുന്ന ഏറ്റവും വിഷമുള്ള മത്സ്യമാണ് സ്റ്റോൺഫിഷ്. കുത്തേറ്റിട്ട് ചികിത്സിച്ചില്ലെങ്കിൽ മരണം സംഭവിക്കാം. വെള്ളത്തിൽ മാത്രമല്ല, കടൽത്തീരത്തും സ്റ്റോൺഫിഷ് കുത്തുകൾ ഉണ്ടാകാം. കാരണം സ്റ്റോൺഫിഷിന് വെള്ളത്തിൽ നിന്ന് 24 മണിക്കൂർ വരെ അതിജീവിക്കാൻ കഴിയും. പാറകളോടും പവിഴപ്പുറ്റുകളോടും സാമ്യമുള്ളതിനാൽ അവയെ എളുപ്പത്തിൽ കാണാൻ കഴിയില്ല.
ശരിയായി തയ്യാറാക്കിയാൽ സ്റ്റോൺ ഫിഷ് മനുഷ്യർക്ക് ഭക്ഷ്യയോഗ്യമാണ്. പ്രോട്ടീൻ അധിഷ്ഠിത വിഷം ചൂടാക്കുമ്പോൾ പെട്ടെന്ന് വിഘടിക്കുന്നു. വിഷത്തിന്റെ പ്രധാന ഉറവിടമായ ഡോർസൽ ഫിനുകൾ നീക്കം ചെയ്ത് വേണം പാകം ചെയ്യാൻ. തെക്കൻ ജപ്പാൻ , തെക്കൻ ഫുജിയാൻ , ചൈനയിലെ ഗുവാങ്ഡോങ് , ഹോങ്കോംഗ് , വിയറ്റ്നാമിന്റെ ചില ഭാഗങ്ങളിലും ഈ മത്സ്യം ഒരു സ്വാദിഷ്ടമായ വിഭവമായി കണക്കാക്കപ്പെടുന്നു.
