പ്രധാനമന്ത്രി നരേന്ദ്രമോദിക്ക് വർഷങ്ങൾ പഴക്കമുള്ള ഒരു ഓർമ്മ സമ്മാനം നൽകി ചെസ് താരം വന്തിക അഗർവാൾ. ലോക ചെസ് ഒളിമ്പ്യാഡിൽ ചാമ്പ്യന്മാരായ ഇന്ത്യൻ താരങ്ങൾ പ്രധാനമന്ത്രിയായി കൂടിക്കാഴ്ച നടത്തിയപ്പോഴായിരുന്നു താരം നരേന്ദ്രമോദിക്കായി സമ്മാനം കരുതി വച്ചത്. ഇതിന്റെ ചിത്രങ്ങളാണ് ഇപ്പോൾ സമൂഹമാദ്ധ്യമങ്ങളിൽ വൈറലാവുന്നത്.
2010ൽ ഗുജറാത്ത് മുഖ്യമന്ത്രിയായിരിക്കെ ഖേൽ മഹാകുംഭ് പദ്ധതിയുടെ ഭാഗമായി ‘സ്വർണീം ചെസ് മഹോത്സവം’ സംഘടിപ്പിച്ച കാര്യം താരങ്ങളുമായുള്ള കൂടിക്കാഴ്ചയിൽ പ്രധാനമന്ത്രി മോദി അനുസ്മരിച്ചിരുന്നു. 2012-ൽ അദ്ദേഹം ഗാന്ധിനഗറിൽ ‘സ്വാമി വിവേകാനന്ദ മഹിളാ ചെസ് മഹോത്സവും സംഘടിപ്പിച്ചിരുന്നു. മത്സരത്തിൽ 3,500 വനിതാ ചെസ് താരങ്ങൾ പങ്കെടുത്തിരുന്നുവെന്നും പ്രധാനമന്ത്രി പറഞ്ഞു. അദ്ദേഹത്തിന്റെ വാക്കുകൾ പൂർത്തിയാക്കിയതും വന്തിക പ്രധാനമന്ത്രിക്ക് ഒരു ചിത്രം സമ്മാനിക്കുകയായിരുന്നു.
സ്വാമി മഹിളാ ചെസ് മഹോത്സവത്തിന്റെ ചടങ്ങിൽ വന്തികയും പങ്കെടുത്തിരുന്നു. 9 വയസിന് താഴെയുള്ള പെൺകുട്ടികളുടെ ചെസ് മത്സരത്തിൽ ഏഷ്യൻ ചാമ്പ്യൻഷിപ്പ് സ്വന്തമാക്കിയ വന്തികയെ പ്രധാനമന്ത്രി അന്ന് അനുമോദിച്ചിരുന്നു. ഇതിന്റെ ചിത്രമാണ് പ്രധാനമന്ത്രിക്ക് വന്തിക സമ്മാനിച്ചത്.
അനുമോദന ചടങ്ങിൽ പ്രധാനമന്ത്രിയിൽ നിന്നും തനിക്ക് ഒരുപാട് പ്രചോദനം ലഭിച്ചിരുന്നുവെന്നും വീണ്ടും അദ്ദേഹത്തെ നേരിൽ കാണമെന്ന് ആഗ്രഹമുണ്ടായിരുന്നുവെന്നും വന്തിക പറഞ്ഞു. തനിക്ക് ഇത്തരത്തിൽ പ്രത്യേക സമ്മാനം ലഭിച്ചതിന്റെ സന്തോഷം പ്രധാനമന്ത്രിയും വ്യക്തമാക്കി.
ബുഡാപെസ്റ്റിൽ നടന്ന ടൂർണമെന്റിലാണ് ഇന്ത്യൻ താരങ്ങൾ സ്വർണം നേടിയത്. ടൂർണമെന്റിലെ ഇന്ത്യയുടെ ആദ്യ സ്വർണ മെഡലാണിത്.
