തിരുവനന്തപുരം: സിപിഎമ്മിനെതിരെയും മുഖ്യമന്ത്രി പിണറായി വിജയനെതിരെയും ഉയർത്തിവിട്ട വിവാദങ്ങൾ കത്തിപ്പടരുന്നതിനിടെ പുതിയ പാർട്ടി രൂപീകരിക്കുമെന്ന പ്രഖ്യാപനവുമായി പി വി അൻവർ. തന്റേതായ പുതിയ രാഷ്ട്രീയ പാർട്ടി രൂപീകരിക്കുമെന്നും ഇനി പറയാതിരുന്നിട്ട് കാര്യമില്ലെന്നും അൻവർ പറഞ്ഞു.
”ജനങ്ങളുടെ മനസറിയുന്നത് തെരഞ്ഞെടുപ്പിലൂടെയാണ്. ആ മനസ് അറിയണമെങ്കിൽ ഒരു രാഷ്ട്രീയ പാർട്ടി രൂപീകരിച്ച് തെരഞ്ഞെടുപ്പിനെ നേരിടണം. ഞാൻ ഉയർത്തിയ വിഷയങ്ങളിൽ കേരളത്തിലെ ലക്ഷക്കണക്കിന് യുവാക്കളുടെ പിന്തുണയുണ്ട്. യുവാക്കൾ കൂടെ വരുമെന്നതിൽ ഉറപ്പുണ്ട്”- പി വി അൻവർ പറഞ്ഞു.
രാഷട്രീയ പാർട്ടികളെ മാത്രമേ വോട്ടർ അംഗീകരിക്കുകയുള്ളൂ. യുവാക്കൾ ഉൾപ്പെട്ട പുതിയ ടീം വരും. സംസ്ഥാനത്തെ എല്ലാ പഞ്ചായത്തുകളിലും പാർട്ടിക്ക് സ്ഥാനാർത്ഥികളുണ്ടാകുമെന്നും ദളിത്, പിന്നാക്ക വിഭാഗങ്ങളെ കൂട്ടി ചേർത്തായിരിക്കും പുതിയ പാർട്ടിയുടെ രൂപീകരണമെന്നും അൻവർ പറഞ്ഞു.
അതേസമയം മുഖ്യമന്ത്രി ഹിന്ദു പത്രത്തിന് നൽകിയ അഭിമുഖത്തിന് പിന്നിൽ ഗൂഢാലോചനയുണ്ടെന്നും അദ്ദേഹം മാദ്ധ്യമങ്ങളോട് വ്യക്തമാക്കിയിരുന്നു. മുഖ്യമന്ത്രി പറയുന്നത് പച്ചക്കള്ളമാണെന്നും ഇന്നലെ കണ്ടത് മുഖ്യമന്ത്രിയുടെ നാടകമാണെന്നും അൻവർ വിമർശിച്ചു.
