കൊച്ചി: കോസ്മറ്റോജി വിദഗ്ധൻ എന്ന് പറഞ്ഞ് അമിതവണ്ണത്തിന് ശസ്ത്രക്രിയ നടത്തിയ വ്യാജ ഡോക്ടർ അറസ്റ്റിൽ. തിരുവനന്തപുരം വർക്കല ചെമ്മരുതി സജു ഭവനിൽ സജു സഞ്ജീവ്(27) ആണ് പിടിയിലായത്.
2023 മെയ്യ് 24 ന്, കടവന്ത്ര മെഡിഗ്ലോ എന്ന സ്ഥാപനത്തിൽ വെച്ചായിരുന്നു പ്രതി തിരുവനന്തപുരം സ്വദേശിനിയായ യുവതിക്ക് താക്കോൽദ്വാര ശസ്ത്രക്രിയ നടത്തിയത്. വണ്ണം കുറയാത്തതിനെ തുടർന്ന് യുവതി വീണ്ടും ക്ലിനിക്കിൽ എത്തി സജുവിനെ കണ്ടു. തുടർന്ന് ജൂൺ 11 ന് സ്ഥാപനത്തിൽ വെച്ച് ഓപ്പൺ ശസ്ത്രക്രിയയും നടത്തി. പിന്നാലെ യുവതിക്ക് ഗുരുതരായ അണുബാധയും വേദനയുമുണ്ടായി. ആരോഗ്യ സ്ഥിതി മോശമായപ്പോഴാണ് യുവതി പൊലീസിനെ സമീപിച്ചത്.
കോഴിക്കോട് സ്വദേശിയായ ഡോക്ടറുടെ രജിസ്ട്രേഷൻ ഉപയോഗിച്ച് 2023 ലാണ് പ്രതി കടവന്ത്രയിൽ സ്ഥാപനം ആരംഭിച്ചത്. പ്രതി ഒരു വർഷത്തെ കോസ്മറ്റോളജി കോഴ്സ് മാത്രമേ പൂർത്തിയാക്കിയിട്ടുള്ളുവെന്നും സർജറിയിൽ പ്രാവിണ്യമില്ലെന്നും പൊലീസ് അന്വേഷണത്തിൽ കണ്ടെത്തി.
