പനാജി: ഡീസൽ ബസുകളോട് ബൈ പറയാൻ ഗോവ സർക്കാർ. കദംബ ട്രാൻസ്പോർട്ട് കോർപ്പറേഷനാണ് ഡീസൽ ബസുകൾ ഒഴിവാക്കി ഇലക്ട്രിക് ബസുകളിലേക്ക് ചുവടുമാറുമെന്ന് അറിയിച്ചിരിക്കുന്നത്. മുഖ്യമന്ത്രി പ്രമോദ് സാവന്താണ് സുപ്രധാന പ്രഖ്യാപനം നടത്തിയത്.
500 ഇലക്ട്രിക് ബസുകൾ നിരത്തിലിറക്കാനാണ് ലക്ഷ്യമിടുന്നതെന്ന് മുഖ്യമന്ത്രി അറിയിച്ചു. സംസ്ഥാനത്തിന്റെ ഗ്രാമപ്രദേശങ്ങളിൽ ഗതാഗതം സുഗമമാക്കുന്നതിനായി 1980 മുതൽ ആരംഭിച്ച ട്രാൻസ്പോർട്ട് കോർപ്പറേഷന്റെ വാർഷിക പരിപാടിക്കിടെയാണ് മുഖ്യമന്ത്രിയുടെ പ്രകൃതി സൗഹൃദ പ്രഖ്യാപനം. കോർപ്പറേഷൻ ലാഭത്തിലാക്കുന്നതിലും ഇത് നിർണായകമാകും.
പൊതുഗതാഗതം മെച്ചപ്പെടുത്തുന്നതിന്റെ ഭാഗമായി ഇലക്ട്രിക് ബസുകൾ അവതരിപ്പിക്കാൻ നിക്ഷേപം നടത്താനുള്ള ഐഐടി അലുംനിയുടെ നിർദ്ദേശത്തിന് ഗോവ സർക്കാർ അടുത്തിടെ അംഗീകാരം നൽകിയിരുന്നു. 700 കോടി രൂപയുടെ നിക്ഷേപമാകും നടത്തുക. കൂടുതൽ ഇലക്ട്രിക് ബസുകൾ വരുന്നതോടെ ഉൾപ്രദേശങ്ങളിലേക്കും സർവീസുകളുടെ എണ്ണം കൂട്ടാൻ സഹായിക്കും. നിലവിൽ 54 ഇലക്ട്രിക് ബസുകൾ മാത്രമാണുള്ളത്.
