തിരുവനന്തപുരം : രാമനും , കദീജയും സിനിമയുടെ സംവിധായകന് ദിനേശന്‍ പൂച്ചക്കാടിന് വധഭീഷണി. കഴിഞ്ഞ ദിവസം വീട്ടിന്റെ വരാന്തയിലാണ് ഭീഷണി സന്ദേശം കൊണ്ടു വച്ചിരുന്നത് . സംഭവത്തില്‍ ബേക്കൽ പോലീസ് കേസ് രജിസ്റ്റര്‍ ചെയ്തു.
രാമനും , കദീജയും എന്ന ചിത്രം കാസർകോടും , പരിസരങ്ങളിലുമായി ചിത്രീകരണം പൂർത്തീകരിച്ചു കഴിഞ്ഞു . ഉടൻ തിയേറ്ററുകളിൽ പ്രദർശനത്തിനെത്തും . അതിനിടെയാണ് സംവിധായകന് ഭീഷണി വന്നിരിക്കുന്നത് . നേരത്തെ സിനിമയുടെ ഷൂട്ടിംഗ് സമയത്തും ഭീഷണികൾ വന്നിരുന്നതായി ദിനേശൻ പൂച്ചക്കാട് പറഞ്ഞു.
സിനിമയുടെ പ്രമേയമാണ് വധഭീഷണിക്ക് കാരണമായത്. ചിത്രത്തിന് രാമനും , കദീജയും എന്ന് പേരിട്ടത് എന്തിനാണെന്ന് ചോദിച്ചാണ് ഭീഷണികൾ വരുന്നത് . വീടിനു മുന്നിൽ നിന്ന് ലഭിച്ച കത്തിലും അതാണ് പറയുന്നതെന്നും , ഒപ്പം അസഭ്യവാക്കുകളുമുണ്ടെന്നും ദിനേശൻ പൂച്ചക്കാട് പറഞ്ഞു.കാഞ്ഞങ്ങാട് സ്വദേശികളായ കലാകാരന്മാരുടെ കൂട്ടായ്മയിലാണ് ഈ സിനിമ യാഥാർത്ഥ്യമാകുന്നത്.
