സ്റ്റൈൽ മന്നൻ രജനികാന്തിന്റെ ക്ലാസ് സിനിമ വേട്ടയാൻ ഇരുകയ്യും നീട്ടിയാണ് പ്രേക്ഷകർ സ്വീകരിച്ചത്. അമിതാഭ് ബച്ചൻ, മഞ്ജു വാര്യർ, ഫഹദ് ഫാസിൽ, റാണ ദഗ്ഗുപതി തുടങ്ങി വൻ താരനിരയാണ് സിനിമയിലുള്ളത്. കൃത്യമായ രാഷ്ട്രീയം ചർച്ച ചെയ്യുന്ന സ്ലോ പേസ് ക്ലാസ് സിനിമയാണ് വേട്ടയാനെങ്കിലും ചിത്രത്തിലെ മരണമാസ് ഗാനമായ ‘ മനസിലായോ’ പ്രേക്ഷകർ ഒന്നടങ്കം ഏറ്റെടുത്തിരുന്നു. മുതിർന്നവരെന്നോ കൊച്ചു കുട്ടികളെന്നോ വേർതിരിവില്ലാതെ ‘ മനസിലായോ’ ഏറ്റെടുത്തതിന്റെ കാഴ്ചയാണ് നടി മഞ്ജു വാര്യർ ഇപ്പോൾ പങ്കുവച്ചിരിക്കുന്നത്.
ഇൻസ്റ്റഗ്രാമിൽ തന്റെ സ്റ്റോറിയായി ഒരു കൊച്ചു കുട്ടി ഡാൻസ് കളിക്കുന്നതിന്റെ വീഡിയോയാണ് മഞ്ജു പോസ്റ്റ് ചെയ്തത്. ഏകദേശം 2 വയസു മാത്രം പ്രായമായ കുട്ടി അമ്മയുടെ മടിയിലിരുന്ന് പാട്ട് വയ്ക്കാൻ ആവശ്യപ്പെടുകയാണ്. മൊബൈലിൽ പല പാട്ടുകളും കാണിച്ചെങ്കിലും കുട്ടി മനസിലായോ വേണമെന്ന ഒറ്റ നിർബന്ധത്തിലായിരുന്നു. അവസാനം പാട്ടെത്തിയപ്പോൾ അമ്മയുടെ കയ്യിൽ നിന്ന് ഫോൺ വാങ്ങി മേശപ്പുറത്ത് വയ്ക്കുകയാണ്. ഇനി പാട്ട് മാറ്റേണ്ട ഇത് തന്നെ ഞാൻ ഉദ്ദേശിച്ച പാട്ടെന്ന തരത്തിൽ പിന്നീട് കുട്ടി തകർപ്പൻ ഡാൻസും കളിച്ചു.
View this post on Instagram
‘ ariha- ajay’ എന്ന ഇൻസ്റ്റഗ്രാം ഉപയോക്താവ് പോസ്റ്റ് ചെയ്ത വീഡിയോയാണ് മഞ്ജു പങ്കുവച്ചത്. ‘ ഒരുപാട് ഇഷ്ടപ്പെട്ടു, മോൾക്ക് കെട്ടിപിടിച്ചൊരു ഉമ്മ നൽകുന്നു” എന്ന അടിക്കുറിപ്പോടെയാണ് താരം വീഡിയോ സ്റ്റോറിയായി പോസ്റ്റ് ചെയ്തത്. വീഡിയോ വൈറലായതോടെ കൊച്ചു കുട്ടിക്ക് അഭിനന്ദനങ്ങൾ അറിയിച്ച് നിരവധി പേർ രംഗത്തെത്തി.
