തിയേറ്ററിൽ തരംഗമായി മാറിയ, ചിത്രം ബോഗയ്ൻവില്ലയുടെ സക്സസ് ടീസർ പങ്കുവച്ച് സംവിധായകൻ അമൽ നീരദ്. ചിത്രത്തിലെ ത്രില്ലർ രംഗങ്ങൾ ഉൾപ്പെടുത്തിയുള്ള വീഡിയോയാണ് പങ്കുവച്ചിരിക്കുന്നത്. യുട്യൂബ് ചാനലിലൂടെ പുറത്തുവിട്ട വീഡിയോ സമൂഹമാദ്ധ്യമങ്ങളിൽ വൈറലാവുകയാണ്.
കുഞ്ചാക്കോ ബോബനും ജ്യോതിർമയിയും പ്രധാന വേഷത്തിലെത്തിയ ബോഗയ്ൻവില്ല മികച്ച പ്രേക്ഷക പ്രതികരണങ്ങൾ നേടിയാണ് ബോക്സോഫീസിൽ കുതിക്കുന്നത്. സൈക്കോളജിക്കൽ ത്രില്ലർ ചിത്രമായി മാറിയ ബോഗയ്ൻവില്ല നാല് ദിവസം കൊണ്ട് 25 കോടിയിലധികം രൂപ നേടിയെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. അമൽ നീരദിന്റെ മേക്കിംഗും സുഷീൻ ശ്യാമിന്റെ പശ്ചാത്തല സംഗീതവുമൊക്കെ പ്രേക്ഷക ഹൃദയങ്ങൾ കീഴടക്കിയിരിക്കുകയാണ്.
സുഷിന്റെ സ്തുതി എന്ന ഗാനമാണ് ഇന്ന് സോഷ്യൽ മീഡിയയിൽ ട്രെൻഡ് ലിസ്റ്റിലുള്ളത്. ഫഹദ് ഫാസിൽ, ഫറഫുദ്ദീൻ, ശ‍ൃന്ദ, വീണ നന്ദകുമാർ എന്നിവരും ചിത്രത്തിൽ നിർണായക കഥാപാത്രങ്ങൾ ചെയ്യുന്നുണ്ട്. ജ്യോതിർമയിയുടെ കഥാപാത്രത്തെ കേന്ദ്രീകരിച്ചാണ് കഥ മുന്നോട്ട് പോകുന്നത്.
ത്രില്ലറും സസ്പെൻസും ഒളിപ്പിച്ച ചിത്രം ആക്ഷൻ സീനുകൾ കൊണ്ടും പ്രേക്ഷകരെ പിടിച്ചിരുത്തുന്നുണ്ട്. റീത്തു, റോയ്സ് എന്നീ രണ്ട് കഥാപാത്രങ്ങളിലൂടെയാണ് സിനിമ സഞ്ചരിക്കുന്നത്. ഓർമകൾക്കും മറവിയ്‌ക്കുമിടയിൽ ജീവിക്കുന്ന നായിക അപ്രതീക്ഷിതമായി ഒരു കൊലപാതക കേസിന്റെ ഭാഗമാകുന്നതും തുടർന്ന് നടക്കുന്ന സംഭവ വികാസങ്ങളുമാണ് സിനിമ. ഒരു അമൽ നീരദ് ചിത്രത്തിൽ പ്രേക്ഷകർ എന്തൊക്കെയാണോ പ്രതീക്ഷിക്കുന്നത്, അതെല്ലാം സംവിധായകൻ ബോഗയ്ൻവില്ലയിൽ ഉൾപ്പെടുത്തിയിട്ടുണ്ട്.
