മോസ്കോ: റഷ്യൻ പ്രസിഡന്റ് വ്ളാഡിമർ പുടിനുമായി കൂടിക്കാഴ്ച നടത്തി പ്രധാനമന്ത്രി നരേന്ദ്രമോദി. ഇന്ത്യ- റഷ്യ സൗഹൃദബന്ധം ഉറച്ചതാണെന്നും പ്രധാനമന്ത്രി നരേന്ദ്രമോദിയെ വീണ്ടും കാണാൻ സാധിച്ചതിൽ സന്തോഷമുണ്ടെന്നും പുടിൻ പറഞ്ഞു. പരസ്പരം ആലിംഗനം ചെയ്താണ് ഇരുനേതാക്കളും സൗഹൃദ ത്തിന്റെ ആഴം തുറന്നുകാട്ടിയത്. 16-ാമത് ബ്രികസ് ഉച്ചകോടിക്കായി റഷ്യയിലെത്തിയതായിരുന്നു പ്രധാനമന്ത്രി.
മോദി- പുടിൻ കൂടിക്കാഴ്ചയിൽ യുക്രെയ്ൻ സംഘർഷവും ചർച്ചയായി. ചർച്ചകളിലൂടെ യുദ്ധം അവസാനിപ്പിക്കുന്നതിനായി റഷ്യ മുൻകൈ എടുക്കണമെന്ന് പ്രധാനമന്ത്രി ആവശ്യപ്പെട്ടു. റഷ്യ- യുക്രെയ്ൻ സംഘർഷം സമാധാനപരമായി പരിഹരിക്കപ്പെടുമെന്ന് വിശ്വാസമുണ്ടെന്നും സമാധാനം പുനഃസ്ഥാപിക്കുന്നതിനായി ഇന്ത്യയുടെ ഭാഗത്ത് നിന്നും എല്ലാവിധ പിന്തുണയും നൽകുമെന്നും പ്രധാനമന്ത്രി വ്യക്തമാക്കി.
റഷ്യ- ഇന്ത്യ ബന്ധം വിശിഷ്ടമാണെന്നും ഇരു രാജ്യങ്ങൾ തമ്മിലുള്ള സൗഹൃദം ദൃഢപ്പെടുത്തുന്നതിനും ഇന്ത്യ നൽകുന്ന പിന്തുണയ്ക്കും സന്തോഷമുണ്ടെന്നും പുടിൻ അറിയിച്ചു. ബ്രിക്സ് ഉച്ചകോടിയുടെ അവസാനത്തിൽ കാസൻ പ്രഖ്യപനവുമുണ്ടാകുമെന്നും പുടിൻ പറഞ്ഞു. പ്രഖ്യാപനത്തിൽ പുതിയ അഞ്ച് ബ്രിക്സ് അംഗങ്ങളെ കൂടി ചേർക്കുമെന്നും അദ്ദേഹം വ്യക്തമാക്കി.
A connect like no other!
Thankful for the welcome in Kazan. The Indian community has distinguished itself all over the world with their accomplishments. Equally gladdening is the popularity of Indian culture globally. pic.twitter.com/5Tc7UAF9z3
— Narendra Modi (@narendramodi) October 22, 2024
ഈ വർഷം ഇത് രണ്ടാം തവണയാണ് പ്രധാനമന്ത്രി റഷ്യയിലെത്തുന്നത്. ജൂലൈ 22 ന് ഇന്ത്യ- റഷ്യ വാർഷിക ഉച്ചകോടിയിൽ പങ്കെടുക്കാനെത്തിയ പ്രധാനമന്ത്രിക്ക് പരമോന്നത ബഹുമതി നൽകി റഷ്യ ആദരിച്ചിരുന്നു. ഇന്ത്യക്കും റഷ്യക്കും പുറമെ ബ്രസീൽ, ചൈന, ദക്ഷിണാഫ്രിക്ക തുടങ്ങിയ രാജ്യങ്ങളിലെ പ്രതിനിധികളാണ് ഉച്ചകോടിയിൽ പങ്കെടുക്കുന്നത്.
മൂന്ന് മാസത്തിനിടയിലെ രണ്ടാം സന്ദർശനം ഇരുരാജ്യങ്ങളും തമ്മിലുളള ആഴത്തിലുളള സൗഹൃദവും അടുത്ത സഹകരണവുമാണ് വ്യക്തമാക്കുന്നതെന്ന് മോദി പറഞ്ഞു. ജൂലൈയിൽ നടന്ന കൂടിക്കാഴ്ചയെക്കുറിച്ച് ഓർമ്മിപ്പിച്ച പുടിൻ എല്ലാ അവസരങ്ങളിലും നല്ല ചർച്ചകളാണ് നടന്നിട്ടുളളതെന്നും ചൂണ്ടിക്കാട്ടി. തന്റെ ക്ഷണം സ്വീകരിച്ച് കാസനിൽ എത്തിയതിനും മോദിക്ക് പുടിൻ നന്ദി പറഞ്ഞു.
