വൈൻ ഇഷ്ടമില്ലാത്തവരായി ആരുമുണ്ടാകില്ല. മുന്തിച്ചാറിട്ട് വാറ്റിയെടുത്ത അസൽ വീഞ്ഞിന്റെ വീര്യം പഴകുന്തോറും കൂടി വരും. നല്ല മുന്തിരിയാണെങ്കിൽ വീഞ്ഞിന്റെ രുചിയും ഗുണമൊക്കെ കൂടും. ഉയരം കൂടുന്തോറും ചായയുടെ മാത്രമല്ല, മുന്തിരിയുടെയും രുചിയേറുമെന്ന് തെളിയിക്കുകയാണ് ടിബറ്റിലെ മുന്തിരിത്തോപ്പ്.
ലോകത്ത് തന്നെ ഏറ്റവും ഉയരമേറിയ മുന്തിരിത്തോട്ടമെന്ന ഖ്യാതി ടിബറ്റിലെ പ്യുവർ ലാൻഡ് & സൂപ്പർ-ഹൈ ആൾട്ടിറ്റ്യൂഡ് വൈൻയാർഡിനാണ്. കണ്ണഞ്ചിപ്പിക്കുന്ന കാഴ്ചകളാണ് ഇവിടെയുള്ളത്. അടുത്തിടെ ഗിന്നസ് വേൾഡ് റെക്കോർഡ്സ് ഈ മുന്തിരിത്തോട്ടത്തിന്റെ വീഡിയോ പങ്കുവച്ചിരുന്നു. ഇതിന് പിന്നാലെയുള്ള അന്വേഷണം ചെന്നെത്തിയത് ടിബറ്റിലാണ്.
3,563.31 മീറ്റർ അഥവാ 11,690 അടി ഉയരത്തിലാണ് ഈ മുന്തിരിത്തോപ്പ് സ്ഥിതി ചെയ്യുന്നത്. ലാസയിലെ ഖുഷുയി കൗണ്ടിയിലെ ലാസ നദിക്ക് സമീപമാണ് മുന്തിരിത്തോട്ടം സ്ഥിതി ചെയ്യുന്നത്. രാത്രിയിലും പകലും തമ്മിലുള്ള താപനിലയിലെ വ്യത്യാസം മുന്തിരികൾക്ക് അനുയോജ്യമാണ്. ഗിന്നസിൽ ഇടം നേടിയ ഈ മുന്തിരിത്തോപ്പിൽ വളരുന്ന മുന്തിരികൾ ഒരു പക്ഷേ ലോകത്തിലെ തന്നെ ഏറ്റവും മധുരമേറിയ മുന്തിരികളാകും. സൂര്യപ്രകാശമാണ് മധുരം സംഭാവന ചെയ്യുന്നത്. രാത്രിയിലെ തണുപ്പ് മുന്തിരിയിലെ അസിഡിറ്റി വർദ്ധിപ്പിക്കാൻ സഹായിക്കുന്നു.
ഇവിടെ നിന്ന് ലഭിക്കുന്ന മുന്തിരിയിൽ നിന്ന് 60 ഇനം വൈനുകളാണ് പരീക്ഷിച്ചത്. ഇവയിൽ നാലെണ്ണം വിജയം കണ്ടു. പ്രദേശത്തെ ജനങ്ങൾക്ക് തൊഴിലവസരങ്ങൾ സൃഷ്ടിക്കുന്നതിലും ഈ വൈൻ നിർമാണ കേന്ദ്രം പ്രധാന പങ്ക് വഹിക്കുന്നു. 2108 മുതൽ ലോകത്തിലെ ഏറ്റവും ഉയരമേറിയ മുന്തിരിത്തോപ്പ് എന്ന ഗിന്നസ് റെക്കോർ‌ഡ് കൈവശം വച്ചിരിക്കുകയാണ് പ്യുവർ ലാൻഡ് & സൂപ്പർ-ഹൈ ആൾട്ടിറ്റ്യൂഡ് വൈൻയാർഡ്.
