വാഹന പ്രേമികൾ ഏറെ കാത്തിരിക്കുന്ന കാറാണ് 2024 മാരുതി സുസുക്കി ഡിസയർ. ഇന്ത്യയിൽ വരവറിയിക്കാൻ ദിവസങ്ങൾ മാത്രം ബാക്കി നിൽക്കെ പുതിയ ഒരു നേട്ടം സ്വന്തമാക്കിയിരിക്കുകയാണ് ഡിസയർ. ഗ്ലോബൽ NCAP-ൽ 5-സ്റ്റാർ നേടികൊണ്ട് സുരക്ഷയുടെ കാര്യത്തിൽ ഫുൾ മാർക്ക് കരസ്ഥമാക്കിയ ആദ്യ മാരുതി കാറായി മാറിയിരിക്കുകയാണ് 2024 മാരുതി സുസുക്കി ഡിസയർ. മുതിർന്നവർക്കും കുട്ടികൾക്കും യാത്രക്കാർക്കുമുള്ള സുരക്ഷയിൽ ഗംഭീര മാർക്കാണ് ഇടി പരീക്ഷയിൽ കാർ സ്വന്തമാക്കിയത്.
നവംബർ 11-ന് ഇന്ത്യയിൽ നാലാം തലമുറ ഡിസയർ അരങ്ങേറ്റം കുറിക്കും. ആറ് എയർബാഗുകൾ, എല്ലാ സീറ്റുകൾക്കും 3-പോയിൻ്റ് സീറ്റ് ബെൽറ്റുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം (ESP), ഹിൽ ഹോൾഡ് അസിസ്റ്റ്, EBD ഉള്ള എബിഎസ്, റിവേഴ്‌സ് പാർക്കിംഗ് സെൻസറുകൾ, ISOFIX ചൈൽഡ് സീറ്റ് ആങ്കറേജുകൾ എന്നിവയുമായാണ് വാഹനം എത്തുന്നത്.
മുതിർന്നവരുടെയും കുട്ടികളുടെയും യാത്രക്കാരുടെയും സുരക്ഷയിൽ മൂന്നാം തലമുറ ഡിസയർ രണ്ട് സ്റ്റാർ മാത്രമായിരുന്നു നേടിയിരുന്നത്. വാഹനത്തിന്റെ രൂപകൽപ്പനയും പരിമിതമായ സുരക്ഷയും ഏറെ വിമർശനം നേരിടുകയും ചെയ്തു. അതിനെല്ലാമുള്ള മറുപടിയാണ് നാലാം തലമുറ ഡിസയർ. സുരക്ഷയുടെ കാര്യത്തിൽ ഫൈവ് സ്റ്റാർ നേടിയതോടെ വിപണിയിൽ വാഹനത്തിന് ഡിമാൻഡ് കൂടുമെന്ന് ഉറപ്പ്. പുതിയ ഡിസയറിന്റെ എക്സ് ഷോറൂം വില 6.70 ലക്ഷം രൂപയായിരിക്കും എന്നാണ് പ്രതീക്ഷ. സബ് കോംപാക്റ്റ് സെഡാൻ സെഗ്‌മെൻ്റിൽ, സെഡാൻ 2025 ഹോണ്ട അമേസ്, ടാറ്റ ടിഗോർ, ഹ്യുണ്ടായ് ഓറ തുടങ്ങിയ മോഡലുകളോട് വാഹനം മത്സരിക്കും.
