ചെറുപ്പം മുതൽ ധാരാളം സ്വപ്നം കാണാറുണ്ടെന്നും അതിൽ കൂടുതലും ഭയപ്പെടുത്തുന്ന സ്വപ്നങ്ങളാണെന്നും നടി നവ്യാ നായർ. പലപ്പോഴും ഇത്തരം സ്വപ്നങ്ങൾ കാരണം ശരിയായി ഉറങ്ങാൻ കഴിയാറില്ല . തന്നെ പോലെ പ്രശ്നങ്ങൾ അഭിമുഖീകരിക്കുന്നവർക്ക് ഈ തുറന്ന് പറച്ചിൽ സഹായകമായേക്കുമെന്നും നവ്യ വ്ലോഗിൽ പറയുന്നു.
“പേടിപ്പിക്കുന്ന സ്വപ്നമാണ് മിക്കപ്പോഴും കാണുക . അത് കണ്ട് ഞെട്ടി ഉണരും . വീണ്ടും ഉറങ്ങിയാൽ ആ സ്വപ്നത്തിന്റെ ബാക്കി കണ്ടെന്നു വരും. ഈ പേടി കാരണം, പിന്നെ ഉറങ്ങില്ല.വെളിച്ചം വന്നാലെ പിന്നെ എനിക്ക് ഉറങ്ങാൻ പറ്റൂ. അപ്പോൾ പേടിയില്ല. ഇരുട്ടു മാറി എന്നൊരു തോന്നലാണ്. അതുവരെ ബുക്ക് വായിക്കുകയോ, മൊബൈലിൽ എന്തെങ്കിലും കണ്ടോ സമയം കളയും .
ചരലും മണലും പാറക്കെട്ടുകളും മാത്രമുള്ള ഒരു സാങ്കൽപിക ലോകത്ത് അകപ്പെട്ടിരിക്കുകയാണ് ഞാൻ . അമ്മയും അച്ഛനും പിന്നെ ലാലേട്ടൻ, പൃഥ്വിരാജ്, ക്യാമറമാൻ പി.സുകുമാർ അങ്ങനെ എല്ലാവരുമുണ്ട് അവിടെ . അവിടെ എന്നെ മാത്രം ആക്രമിക്കുന്ന ഒരു പ്രത്യേകതരം ജീവിയുണ്ട് . കൃഷ്ണമണിയൊക്കെ പുറത്തേക്ക് ഉന്തി , ദേഹത്ത് മുഴുവൻ കുമിളകളുള്ള ജീവിയാണ്. വായ്‌ക്കകത്ത് ത്രികോണ ആകൃതിയിൽ പല്ലു കാണാം.
കണ്ടാൽ പിശാചിനെ പോലെ തോന്നും. ഇത് എന്നെ മാത്രമാണ് ആക്രമിക്കുന്നത്. ഇതിൽ നിന്ന് എന്നെ രക്ഷപ്പെടുത്താൻ സുകുവേട്ടൻ രാജു ചേട്ടൻ , ലാലേട്ടൻ അങ്ങനെ എല്ലാവരും വരും . പറയുമ്പോൾ കോമഡിയാണ്. പക്ഷേ, സ്വപ്നത്തിൽ കാണുമ്പോൾ പേടി തോന്നും,’ നവ്യ പറഞ്ഞു.
ഇങ്ങനെയുള്ള സ്വപ്നങ്ങൾ കാണാതിരിക്കാൻ ഇപ്പോൾ ഒരു മാർഗം കണ്ടെത്തിയിട്ടുണ്ട്. മകനൊപ്പം പത്ത് മണിയോടെ കിടക്കും.രാവിലെ നേരത്തെ ഉണരും . എന്നു കരുതി സ്വപ്നം കാണൽ മാറിയിട്ടില്ല .പക്ഷേ, സ്വപ്നത്തിൽ നിന്ന് പെട്ടെന്ന് ഉണരാൻ കഴിയുന്നുണ്ട്. കൂടാതെ, പിന്നീട് ഉറങ്ങുമ്പോൾ ബാക്കി സ്വപ്നം കാണുന്നുമില്ല,’ നവ്യ പറഞ്ഞു.
