‘ദൃഢതയോടെ മുന്നോട്ട് പോകുന്ന സൗഹൃദം’; ജോർജിയ മെലോണിയുമായി ഉഭയകക്ഷി ചർച്ച നടത്തി പ്രധാനമന്ത്രി നരേന്ദ്രമോദി

റിയോ ഡി ജനീറോ: ഇറ്റാലിയൻ പ്രധാനമന്ത്രി ജോർജിയ മെലോണിയുമായി കൂടിക്കാഴ്ച നടത്തി പ്രധാനമന്ത്രി നരേന്ദ്രമോദി. ഇന്ത്യയുടെയും ഇറ്റലിയുടെയും സുഹൃദ്ബന്ധം ദൃഢതയോടെ നിലനിൽക്കുന്നതാണെന്ന് പ്രധാനമന്ത്രി പറഞ്ഞു. ജി20 ഉച്ചകോടിയുടെ ഭാഗമായി ബ്രസീലിൽ എത്തിയപ്പോഴായിരുന്നു ലോക നേതാക്കളുടെ കൂടിക്കാഴ്ച.

പ്രതിരോധം, സുരക്ഷ, വ്യാപാരം, സാങ്കേതികവിദ്യ തുടങ്ങിയ മേഖലകളിലെ ബന്ധം ശക്തിപ്പെടുത്തുന്നതിൽ ശ്രദ്ധ കേന്ദ്രീകരിച്ചതായി പ്രധാനമന്ത്രി പറഞ്ഞു. ഇന്ത്യ- ഇറ്റലി ബന്ധം, ലോകം മികച്ചതാക്കാൻ വളരെയധികം സംഭാവനകൾ നൽകുമെന്നും പ്രധാനമന്ത്രി പറഞ്ഞു.

” റിയോ ഡി ജീറോ ജി20 ഉച്ചകോടിക്കിടെ ഇറ്റാലിയൻ പ്രധാനമന്ത്രി ജോർജിയ മെലോണിയെ കണ്ടതിൽ സന്തോഷമുണ്ട്. പ്രതിരോധം, സുരക്ഷ, വ്യാപാരം, സാങ്കേതികവിദ്യ തുടങ്ങിയ മേഖലകളിലെ ബന്ധം കൂടുതൽ ആഴത്തിലാക്കുന്നതുമായി ബന്ധപ്പെട്ട് ചർച്ചകൾ നടത്തി. വിദ്യാഭ്യാസം, സംസ്‌കാരം തുടങ്ങിയ മേഖലകളിലെ സഹകരണം വർദ്ധിപ്പിക്കുന്നതുമായി ബന്ധപ്പെട്ടും ഞങ്ങൾ ചർച്ച ചെയ്തു.”- പ്രധാനമന്ത്രി എക്‌സിൽ കുറിച്ചു.

Glad to have met Prime Minister Giorgia Meloni on the sidelines of the Rio de Janeiro G20 Summit. Our talks centred around deepening ties in defence, security, trade and technology. We also talked about how to boost cooperation in culture, education and other such areas.… pic.twitter.com/BOUbBMeEov

— Narendra Modi (@narendramodi) November 18, 2024

മോദി-മെലോണി കൂടിക്കാഴ്ച സമൂഹമാദ്ധ്യമങ്ങളിൽ വളരെപെട്ടന്ന് വൈറലാവാറുണ്ട്. ഇതിന് മുൻപ് ഇരുവരുടെയും സെൽഫികളും സമൂഹമാദ്ധ്യമങ്ങളിൽ വൈറലായിരുന്നു. ജി20 ഉച്ചകോടിയിൽ പങ്കെടുത്ത പ്രധാനമന്ത്രി, ഫ്രഞ്ച് പ്രസിഡന്റ് ഇമ്മാനുവൽ മാക്രോണുമായും യുഎസ് പ്രസിഡന്റ് ജോ ബൈഡനുമായും പ്രധാനമന്ത്രി കൂടിക്കാഴ്ച നടത്തിയിരുന്നു.