നിലവിലുള്ള പാസ്പോർട്ട് പുതുക്കുമ്പോഴോ, പുതിയ പാസ്പോർട്ട് എടുക്കേണ്ടി വരുമ്പോഴോ പങ്കാളിയുടെ പേര് കൂടി ചേർക്കണമെങ്കിൽ സമർപ്പിക്കേണ്ട രേഖകളെക്കുറിച്ച് വ്യക്തമാക്കി സർക്കാർ. വിവാഹസർട്ടിഫിക്കറ്റ് സമർപ്പിച്ചോ, ഭർത്താവും ഭാര്യയും ഒന്നിച്ച് നിൽക്കുന്ന ഫോട്ടോ പതിച്ച പ്രസ്താവനയിൽ ഒപ്പിട്ട് നൽകിയോ പങ്കാളിയുടെ പേര് ചേർക്കാമെന്ന് സർക്കാർ അറിയിച്ചു. പാസ്പോർട്ട് സേവാ കേന്ദ്രങ്ങളിലെ നടപടിക്രമങ്ങളിൽ മാറ്റം പ്രാബല്യത്തിൽ വന്നുതുടങ്ങിയതായി അധികൃതർ വ്യക്തമാക്കി.
സമാനമായി പാസ്പോർട്ടിൽ നിന്ന് ജീവിതപങ്കാളിയുടെ പേര് ഒഴിവാക്കണമെങ്കിലും നടപടിക്രമങ്ങൾ പാലിക്കണം. മരണസർട്ടിഫിക്കറ്റ്, അല്ലെങ്കിൽ കോടതിയിൽ നിന്ന് ലഭിച്ച വിവാഹമോചന ഉത്തരവ് സമർ‌പ്പിച്ചാൽ പാസ്പോർട്ടിൽ നിന്ന് പങ്കാളിയുടെ പേര് നീക്കം ചെയ്യാം. അതുപോലെ മറ്റൊരു വിവാഹം കഴിച്ചാൽ പഴയ പങ്കാളിയുടെ പേര് പാസ്പോർട്ടിൽ നിന്ന് മാറ്റി പുതിയ പങ്കാളിയുടെ പേര് കൂട്ടിച്ചേർക്കാൻ രേഖകൾ സമർപ്പിക്കണം. ഇതിനായി പുനർവിവാഹം ചെയ്തതിന്റെ സർട്ടിഫിക്കറ്റ് ഹാജരാക്കിയാൽ മതിയാകും. അതുമല്ലെങ്കിൽ പുതിയ പങ്കാളിയോടൊപ്പം നിൽക്കുന്ന ചിത്രം പതിച്ച പ്രസ്താവനയിൽ ഒപ്പിട്ട് സമർപ്പിക്കാവുന്നതുമാണ്.
