കൊച്ചി: നടൻ സൗബിൻ ഷാഹിറിന്റെ ഉടമസ്ഥതയിലുള്ള പറവ ഫിലിംസ് നിർമ്മാണ കമ്പനിയിൽ ആദായ നികുതി വകുപ്പിന്റെ റെയ്ഡ്. സിനിമാ നിർമ്മാണത്തിന്റെ മറവിൽ കള്ളപ്പണ ഇടപാട് നടത്തിയെന്ന ആരോപണവുമായി ബന്ധപ്പെട്ടാണ് കഴിഞ്ഞ ദിവസം പരിശോധന നടന്നത്. കൊച്ചി യൂണിറ്റിലെ ആദായ നികുതി വകുപ്പ് ഉദ്യോഗസ്ഥരാണ് റെയ്ഡ് നടത്തിയത്.
പറവ ഫിലിംസ് കമ്പനിയുടെ ഓഫീസ്, പുല്ലേപ്പടിയിലെ ഡ്രീം ബിഗ് ഡിസ്ട്രിബ്യൂട്ടേഴ്സ് ഓഫീസ് അടക്കമുള്ള ഏഴിടങ്ങളിൽ റെയ്ഡ് നടന്നതായാണ് വിവരം. സൗബിന്റെ കമ്പനിയുടെ സാമ്പത്തിക സ്രോതസുകൾ കേന്ദ്രീകരിച്ചാണ് ഉദ്യോഗസ്ഥർ പരിശോധന നടത്തിയത്. മഞ്ഞുമ്മൽ ബോയ്സ് സിനിമയുടെ നിർമ്മാണവും കളക്ഷനുമായി ബന്ധപ്പെട്ട രേഖകളാണ് പരിശോധിച്ചത്. ദുരൂഹ സാമ്പത്തിക ഇടപാടുകൾ നടന്നതിന്റെ നിർണായക രേഖകൾ കണ്ടെത്തിയെന്നാണ് സൂചന.
പറവ ഫിലിംസ് കമ്പനിക്കും ഡ്രീം ബിഗ് ഡിസ്ട്രിബ്യൂട്ടേഴ്സിനും സംസ്ഥാനത്തെ ഒരു സ്വകാര്യ ധനകാര്യ സ്ഥാപനമാണ് പണം നൽകിയിരിക്കുന്നത്. ഇതിൽ അനധികൃത സാമ്പത്തിക ഇടപാടുകൾ നടന്നതായാണ് ഉദ്യോഗസ്ഥരുടെ സംശയം. കൂടുതൽ അന്വേഷണത്തിന്റെ ഭാഗമായി ഉദ്യോഗസ്ഥർ സൗബിനെ ചോദ്യം ചെയ്തേക്കും.
