നടി മെറീന മൈക്കിളിനെതിരെ സൈബറാക്രമണം. ടെലിവിഷൻ ഷോയിൽ അതിഥിയായി ക്ഷണിക്കപ്പെട്ടപ്പോൾ നേരിട്ട ദുരനുഭവം വെളിപ്പെടുത്തിയതിനു പിന്നാലെയാണിത്.അവതാരകയുടെ പേരു പരാമർശിക്കാതെയായിരുന്നു മെറീനയുടെ തുറന്നു പറച്ചിൽ. എന്നാൽ താരം പറഞ്ഞത് നടിയും അവതാരകയും വ്ലോഗറുമായ പേളി മാണിയെക്കുറിച്ചാണെന്നു പ്രേക്ഷകർ കമന്റ് ചെയ്യാൻ തുടങ്ങിയതോടെ മെറീനയ്‌ക്കെതിരെ സൈബറാക്രമണം രൂക്ഷമായി.സ്വകാര്യ ചാനലിന് നൽകിയ അഭിമുഖത്തിലാണ് മെറീനയുടെ വിമർശനം.
‘ ഒരു ചാനലിലേക്ക് ഇന്റർവ്യൂവിന് വിളിച്ചു. രണ്ടു മൂന്നു തവണ അവർ വിളിച്ച് ക്യാൻസൽ ചെയ്തുകൊണ്ടേയിരുന്നു. ഗസ്റ്റ് ആയി പോകുന്നതു കൊണ്ട് മേക്കപ്പ് ആർടിസ്റ്റിനെയും കോസ്റ്റ്യൂമും ഒക്കെ സെറ്റ് ചെയ്യണമല്ലോ. ക്യാൻസൽ ചെയ്യുന്ന അവസ്ഥ വന്നപ്പോൾ ഞാൻ പറഞ്ഞു, ചേട്ടാ… ഇനി ക്യാൻസൽ ചെയ്താൽ എനിക്കു നാണക്കേടാണ്. ഇനി ശരിക്ക് ഉണ്ടെങ്കിൽ മാത്രം വിളിച്ചാൽ മതിയെന്ന് ! അങ്ങനെ ഓക്കെ എന്നു പറഞ്ഞ് പുള്ളി വിളിച്ചു.
ആ എപ്പിസോഡിന്റെ അവതാരക വേറെ ഒരാളായിരുന്നു. അന്ന് ബ്രേക്കിന്റെ സമയത്താണ് പ്രോഗ്രാം പ്രൊഡ്യൂസർ പറയുന്നത്, മുൻപ് പരിപാടി അവതരിപ്പിച്ചിരുന്ന കുട്ടിക്ക് ഞാനാണ് അതിഥി എന്നു പറഞ്ഞപ്പോൾ അവർക്ക് പരിപാടി അവതരിപ്പിക്കാൻ താൽപര്യമില്ലെന്നു പറഞ്ഞെന്ന്! പുള്ളിക്കാരിക്ക് താൽപര്യമില്ല.
ഗസ്റ്റ് ലിസ്റ്റ് നോക്കുമ്പോൾ ചെയ്യാൻ പറ്റില്ലെന്നു പറയും. ഞങ്ങളെ കാണാനും ഏകദേശം ഒരുപോലെയാണ്. അവർ ഇപ്പോൾ മോട്ടിവേഷൻ ഒക്കെ പറഞ്ഞു നടക്കുന്നുണ്ട്. എനിക്ക് കിട്ടേണ്ട വിസിബിലിറ്റിയെ കട്ട് ഓഫ് ചെയ്തത് ഒരു തരത്തിൽ ജോലി നിഷേധിക്കൽ തന്നെയല്ലേ ? നേരിട്ടു കാണുമ്പോൾ അവർ സൗഹൃദത്തോടെയാണ് സംസാരിക്കുക. ‘ എന്നാണ് മെറീന പറഞ്ഞത്
ഇത് വൈറലായപ്പോൾ വിശദീകരണവുമായി പേളി തന്നെ രംഗത്തെത്തി.അതിഥികളെ തീരുമാനിക്കാൻ അവതാരകർക്ക് അധികാരമില്ലെന്നും അതെല്ലാം പ്രോഗ്രാം പ്രൊഡ്യൂസറുടെ തീരുമാനങ്ങളാണെന്നും പേളി പറയുന്നു. ഇക്കാര്യം വിശദീകരിക്കാൻ ആ നടിയെ വിളിച്ചിരുന്നെന്നും അവർ നടത്തിയ പരാമർശം തന്നെക്കുറിച്ചായിരുന്നുവെന്ന് അവർ പറഞ്ഞെന്നും പേളി വെളിപ്പെടുത്തി. എന്നാൽ തന്റെ ഭാഗം വിശദീകരിക്കാൻ ശ്രമിച്ചപ്പോൾ അവർ അത് കേൾക്കാൻ തയാറായില്ല. – എന്നും പേളി പറഞ്ഞു.
എന്നാൽ താൻ പറഞ്ഞത് സത്യമാണെന്നും , ഞാൻ ചോദിച്ച ചില കാര്യങ്ങൾക്ക് അവർക്ക് മറുപടി ഉണ്ടായിരുന്നില്ല. അങ്ങനെയാണ് ഫോൺ വച്ചത്.ഇക്കാര്യത്തിൽ കൂടുതൽ പ്രതികരിക്കാൻ താൽപര്യമില്ല. തെറിവിളികൾ എനിക്ക് പുതിയതൊന്നുമല്ല. പലതും തുറന്നു പറയുമ്പോൾ ഇതു സംഭവിക്കാറുള്ളതാണെന്നുമാണ് മെറീന പറയുന്നത് .
