ലേഡി സൂപ്പർ സ്റ്റാർ എന്ന പദവി തനിക്ക് ബാദ്ധ്യതയാണെന്ന് നടി നയൻതാര. ദ് ഹോളിവുഡ് റിപ്പോർട്ടർ ഇന്ത്യയ്ക്കു നൽകിയ അഭിമുഖത്തിലാണ് താരത്തിന്റെ പ്രതികരണം .ലേഡി സൂപ്പർ സ്റ്റാർ എന്ന ടൈറ്റിലിൽ അറിയപ്പെടാൻ ആഗ്രഹമില്ലെന്നും നയൻതാര പറഞ്ഞു.
‘ ഈ ടൈറ്റിൽ എനിക്ക് ഉണ്ടാക്കിയ ബുദ്ധിമുട്ടുകൾ വിവരിക്കാൻ പോലും കഴിയില്ല. എന്റെ കരിയറിൽ ഞാൻ അത് അർഹിക്കുന്നുണ്ടോ എന്ന് ഞാൻ ഭയപ്പെടുന്നു. എന്റെ ജീവിതത്തിൽ ഉണ്ടായ മറ്റൊരു വിവാദമാണ് ലേഡി സൂപ്പർ സ്റ്റാർ എന്ന വിളിപ്പേര്. എല്ലാ നിർമാതാക്കളോടും സംവിധായകരോടും പറയുന്നതാണ്, ദയവു ചെയ്ത ആ ടൈറ്റിൽ കാർഡ് ഇടരുതെന്ന്.
ആളുകൾക്ക് എന്നോട് ഉള്ള സ്നേഹവും ബഹുമാനവും ആയിരിക്കാം ഇത്തരത്തിൽ എന്നെ വിളിക്കാൻ ഇഷ്ടപ്പെടുന്നത് എന്നുള്ളതുകൊണ്ട് എനിക്ക് അത് തട്ടിക്കളയാനും കഴിയുന്നില്ല. ഞാൻ ഇന്ത്യയിലെ ഏറ്റവും മികച്ച നടിയോ നർത്തകിയോ ഏറ്റവും മികച്ച വ്യക്തിയോ ആണെന്ന് അവകാശപ്പെടുന്നില്ല. പക്ഷേ ഞാൻ ഇവിടെയുണ്ട്. ഞാൻ 20 വർഷത്തിലേറെയായി മുൻനിരയിൽ തന്നെ ഉണ്ട്. അത് അത്ര എളുപ്പമല്ല. എന്റെ കഠിനാധ്വാനം കൊണ്ടാണ് ഞാൻ ഇവിടെ എത്തിച്ചേർന്നത് എന്ന് നിങ്ങൾക്കറിയാം.
എന്നെ അത്തരത്തിൽ ആരെങ്കിലും വിളിക്കുന്നത് കാണുമ്പോൾ പലർക്കും അസൂയ ഉണ്ടാകാറുണ്ടെന്ന് ഞാൻ മനസ്സിലാക്കുന്നുണ്ട്. പ്രത്യേകിച്ച് പുരുഷന്മാർക്ക് . ഒരു സ്ത്രീ വിജയിച്ച് കാണുകയോ അല്ലെങ്കിൽ അവരെക്കാൾ ഉയർന്ന സ്ഥാനത്ത് എത്തി എന്നു തോന്നുമ്പോഴോ ഒരുതരം പക ഉണ്ടായി വരുന്നുണ്ടെന്ന് തോന്നാറുണ്ട്. വിജയിച്ച ഒരു സ്ത്രീയെ കാണുമ്പോൾ എന്താണ് ഇവർക്ക് പ്രശ്നം എന്ന് മനസിലാക്കാൻ ഞാൻ എപ്പോഴും ശ്രമിക്കാറുണ്ട്. പക്ഷേ, അതിനുത്തരം കിട്ടാറില്ല
കരിയറിന്റെ തുടക്കത്തിൽ തന്നെ ഞാൻ ഇന്ത്യയിലെ ഏറ്റവും വലിയ സൂപ്പർ താരങ്ങൾക്കൊപ്പമാണ് അഭിനയിച്ചിട്ടുള്ളത്.എന്റെ ജീവിതത്തിൽ സംഭവിച്ച നല്ല കാര്യങ്ങൾക്ക് ഞാൻ 50% എന്നോടൊപ്പം അഭിനയിച്ച സൂപ്പർതാരങ്ങളോടും കടപ്പെട്ടിരിക്കുന്നു. ബാക്കി 50% ഞാൻ എന്റെ കഴിവ് തന്നെയാണെന്ന് കരുതുന്നു. – നയൻതാര പറഞ്ഞു.
