ദുബായ്: അടുത്ത വർഷം മുതൽ യു.എ.ഇയിൽ എല്ലാവർക്കും ആരോഗ്യ ഇൻഷുറൻസ് നിർബന്ധമാക്കി. സ്വകാര്യമേഖലയിലെ തൊഴിലാളികൾക്കും ഗാർഹിക തൊഴിലാളികൾക്കും കുറഞ്ഞ പ്രീമിയത്തിലുള്ള അടിസ്ഥാന ആരോഗ്യ ഇൻഷുറൻസും പ്രഖ്യാപിച്ചു.
യു.എ.ഇയിൽ അടുത്ത വർഷം മുതൽ ആരോഗ്യ ഇൻഷുറൻസ് ഇല്ലാത്തവർക്ക് പുതിയ വീസ എടുക്കാനും നിലവിലുളള വീസ പുതുക്കാനും സാധിക്കില്ല. നിലവിൽ അബുദാബി, ദുബായ് എമിറേറ്റുകളിലെ വീസക്കാർക്കു മാത്രമാണ് നിർബന്ധിത ആരോഗ്യ ഇൻഷുറൻസ് പരിരക്ഷ ആവിശ്യമായുള്ളത്. മറ്റ് എമിറ്റേറുകളിലേക്കുകൂടി ഇൻഷുറൻസ് പദ്ധതി വ്യാപിപ്പിക്കുന്നതോടെ രാജ്യത്തെ മുഴുവൻ തൊഴിലാളികളെയും ഇൻഷുറൻസിന്റെ പരിധിയിൽ കൊണ്ടുവരികയെന്നതാണ് ലക്ഷ്യമിടുന്നത്.
2024 ജനുവരി 1 ന് മുൻപ് നൽകിയ വർക്ക് പെർമിറ്റുള്ള ജീവനക്കാർക്ക് രേഖകൾ പുതുക്കാനുള്ള സമയമാകുമ്പോൾ മാത്രമാണ് പുതിയ നിർദ്ദേശം ബാധകമാകുക. സ്വകാര്യമേഖലയിലെ തൊഴിലാളികൾക്കും ഗാർഹിക തൊഴിലാളികൾക്കും കുറഞ്ഞ പ്രീമിയത്തിലുളള അടിസ്ഥാന ആരോഗ്യ ഇൻഷുറൻസാണ് പ്രഖ്യാപിച്ചിട്ടുളളത്. വർഷത്തിൽ 320 ദിർഹം പ്രീമിയത്തിൽ ഇൻഷുറൻസ് പരിരക്ഷ നേടാം. വടക്കൻ എമിറേറ്റിലെ തൊഴിലാളികൾക്കും ഗാർഹിക തൊഴിലാളികൾക്കുമായാണ് അടിസ്ഥാന ആരോഗ്യ ഇൻഷുറൻസ് പ്രഖ്യാപിച്ചിരിക്കുന്നത്.
