അയ്യപ്പസ്വാമിയെ കാണാൻ സ്കേറ്റിംഗ് ചെയ്ത് എത്താനൊരുങ്ങി 16-കാരൻ. പാലക്കാട് അകത്തേത്തറ സ്വദേശി മനുരാജാണ് സ്കേറ്റിംഗ് ചെയ്ത് സന്നിധാനത്തേക്ക് യാത്ര പുറപ്പെട്ടത്. സ്കേറ്റിംഗിൽ ലിങ്കാ ബുക്ക് ഓഫ് റെക്കോർഡ്സും ബെസ്റ്റ് ഓഫ് ഇന്ത്യൻ റെക്കോർഡ്സും കരസ്ഥമാക്കിയ മിടുക്കനാണ് മനുരാജ്. റെക്കോർഡ് സ്വന്തമാക്കിയതിന് പിന്നാലെയാണ് കന്നിമലയാത്ര സ്കേറ്റിംഗിലൂടെ നടത്തുന്നത്.
കെട്ട് നിറച്ചാണ് യാത്ര പുറപ്പെട്ടത്. മൂന്ന് ദിവസം കൊണ്ട് വിവിധ ക്ഷേത്രങ്ങളിൽ ദർശനം നടത്തി പമ്പയിലെത്തുകയാണ് ലക്ഷ്യം. സുരക്ഷാ കാര്യങ്ങൾ വിലയിരുത്തി അച്ഛൻ മണി ഇരുചക്ര വാഹനത്തിലും അമ്മ രുഗ്മിണി പുറകേ കാറിലും ഒപ്പമുണ്ടാകും.
ഒന്നാം ക്ലാസിൽ പഠിക്കുമ്പോൾ മുതൽ സ്കേറ്റിംഗും മനുരാജ് പഠിക്കുന്നു. സ്കേറ്റ് ചെയ്ത് ശബരിമലയിലെത്തണമെന്ന് ആഗ്രഹമുണ്ടായിരുന്നു. അച്ഛനോട് തന്റെ ആഗ്രഹം പങ്കുവച്ചപ്പോൾ ഒപ്പം നിന്നു. മൂന്ന് ദിവസത്തെ യാത്രയാണ്. രാവിലെ ആരംഭിക്കുന്ന യാത്ര വൈകുന്നേരം ആറ് മണി വരെ തുടരും. വൈകുന്നേരം അമ്പലങ്ങളിൽ തങ്ങുമെന്നും മനുരാജ് പറഞ്ഞു.
