രാജ്യത്തെ അക്കൗണ്ടിംഗ് മേഖലയിലേക്ക് പുതുതായി 11,500 ചാർട്ടേർഡ് അക്കൗണ്ടൻ്റുമാർ കൂടി. ഈ വർഷം നടന്ന ചാർട്ടേർഡ് അക്കൗണ്ടൻ്റസി (സിഎ) ഫൈനൽ എക്സാമിന്റെ ഫലം പുറത്തുവന്നതോടെയാണ് അക്കൗണ്ടിംഗ് മേഖലയിലെ രാജ്യത്തിന്റെ കുതിപ്പ് വെളിവായത്. ഇൻസ്റ്റിറ്റ്യൂട്ട് ഓഫ് ചാർട്ടേർഡ് അക്കൗണ്ടൻ്റ്സ് ഓഫ് ഇന്ത്യയാണ് (ICAI) ഫലം പുറത്തുവിട്ടത്.
ഇത്തവണ രണ്ട് പേർക്കാണ് ഫസ്റ്റ് റാങ്ക്. 84.67 ശതമാനം മാർക്കോടെ ഹൈദരാബാദ് സ്വദേശി ഹേരാംബ് മഹേശ്വരിയും തിരുപ്പതി സ്വദേശി റിഷബ് ഓസ്ത്വാൾ ആർ എന്നിവരാണ് അഖിലേന്ത്യാ തലത്തിൽ ഒന്നാം റാങ്ക് കരസ്ഥമാക്കിയത്. 83.50 ശതമാനം മാർക്ക് നേടിയാണ് അഹമ്മദാബാദ് സ്വദേശിനി കുഞ്ഞൻകുമാർ ഷാ രണ്ടാം സ്ഥാനം കരസ്ഥമാക്കിയത്. 82.17 ശതമാനം മാർക്കോടെ കൊൽക്കത്ത സ്വദേശി കിഞ്ചൽ അജ്മേര മൂന്നാം റാങ്ക് കരസ്ഥമാക്കി.
ഗ്രൂപ്പ് 1-ൽ 66,987 പേരാണ് പരീക്ഷ എഴുതിയത്. ഇവരിൽ 11,253 പേർ വിജയിച്ചു. ഗ്രൂപ്പ് 2-ൽ 49,459 പേരാണ് പരീക്ഷയെഴുതിയത്. ഇവരിൽ 10,566 പേർ വിജയികളായി. ഇരു ഗ്രൂപ്പിലുമായി 30,763 പേർ സിഎ ഫൈനൽ പരീക്ഷയെഴുതി. ഇവരിൽ 4,134 പേർ ജയിച്ചു. icai.nic.in/caresult എന്ന ഔദ്യോഗിക വെബ്സൈറ്റിലൂടെയാണ് ഫലം പ്രഖ്യാപിച്ചത്.
