ദുബായ്: ജനങ്ങൾക്ക് പുതുവർഷ സമ്മാനവുമായി ദുബായ്. ജനുവരി ഒന്നിന് ദുബായിൽ ബഹുനില പാർക്കിങ് കേന്ദ്രങ്ങൾ ഒഴികെയുള്ള മേഖലകളിൽ പാർക്കിങ് നിരക്ക് ഈടാക്കില്ലെന്ന് അധികൃതർ അറിയിച്ചു. ന്യൂ ഇയർ ദിനമായ ബുധനാഴ്ച ഉപഭോക്തൃ കേന്ദ്രങ്ങളും വാഹന പരിശോധനാ കേന്ദ്രങ്ങളും പ്രവർത്തിക്കില്ല.
പുതുവത്സരദിനത്തിൽ ആർടിഎ കസ്റ്റമേഴ്സ് ഹാപ്പിനസ് സെന്ററുകൾക്കും അവധിയായിരിക്കും. പൊതുഗതാഗത സേവനങ്ങളുടെ സമയക്രമത്തിലും മാറ്റം വരുത്തിയിട്ടുണ്ട്. ഡിസംബർ 31നും , ജനുവരി 1നും അൽ ഗുബൈബയിൽ നിന്നുള്ള ഇ 100 ബസിന്റെ സർവീസ് ഉണ്ടായിരിക്കില്ല. അബുദാബിയിലേക്കു പോകുന്നവർ ഇബ്നു ബത്തൂത്തയിൽ നിന്നുള്ള ഇ 101 ബസ് ഉപയോഗിക്കണം. അൽ ജാഫ്ലിയയിൽ നിന്നു മുസഫയിലേക്കുള്ള ഇ102 ബസും സർവീസ് നടത്തില്ല. പകരം ഇബ്നു ബത്തൂത്തയിൽ നിന്നുള്ള ഇ 101 ബസ് ഉപയോഗിക്കാം.
ദുബായ് മെട്രോ ചൊവ്വാഴ്ച രാവിലെ അഞ്ച് മണിമുതൽ ബുധനാഴ്ച അർധരാത്രി 12 വരെ പ്രവർത്തിക്കും. ചൊവാഴ്ച രാവിലെ ആറു മണിക്ക് ആരംഭിക്കുന്ന ട്രാം സേവനങ്ങൾ വ്യാഴാഴ്ച പുലർച്ചെ ഒരു മണിവരെ ലഭ്യമാകും.
ബുധനാഴ്ച മറീന മാളിൽ നിന്ന് ബ്ലൂ വാട്ടേഴ്സിലേക്ക് വാട്ടർ ടാക്സികൾ വൈകിട്ട് നാലുമണി മുതൽ അർധരാത്രി 12 മണിവരെ സർവീസ് നടത്തും. ഉച്ചയ്ക്ക് ഒരുമണിക്ക് ആരംഭിക്കുന്ന ഫെറി സേവനം വിവിധ റൂട്ടുകളിലായി അർധരാത്രി 12.30 വരെ നീണ്ടുനിൽക്കും.
