H-1B ബി വിസ സൂപ്പറല്ലേ!! ”മഹത്തരമായ പദ്ധതി”; നിലപാട് മാറ്റി ട്രംപ്; ഇലോൺ മസ്ക് ഇഫക്ട്

ന്യൂയോർക്ക്: H-1B ബി വിസ നൽകുന്നതിനെ പിന്തുണച്ച് യുഎസ് നിയുക്ത പ്രസിഡന്റ് ഡോണൾഡ് ട്രംപ്. നേരത്തെ H-1B വിസയെ എതിർത്തയാളായിരുന്നു ട്രംപ്. എന്നാൽ ഇലോൺ മസ്ക്, വിവേക് രാമസ്വാമി എന്നിവരുൾപ്പടെയുള്ള റിപ്പബ്ലിക്കൻ അനുകൂലികൾ H-1B വിസയെ അനുകൂലിച്ച് രം​ഗത്തെത്തിയതിന് പിന്നാലെയാണ് ട്രംപിന്റെ മനംമാറ്റം. H-1B വിസയെ ”മഹത്തരമായ പദ്ധതി” എന്ന് വിശേഷിപ്പിച്ച ട്രംപ്, തന്റെ വസ്തുവകകളിൽ ധാരാളം H-1B ബി വിസകളുണ്ടെന്നും നിരവധി തവണ അത് താൻ ഉപയോ​ഗിച്ചിട്ടുണ്ടെന്നും പ്രതികരിച്ചു. ന്യൂയോർക്ക് പോസ്റ്റിന് നൽകിയ അഭിമുഖത്തിലാണ് ട്രംപിന്റെ തുറന്നുപറച്ചിൽ

അമേരിക്കയെ ദുരുപയോ​ഗം ചെയ്യുന്നതിന് തുല്യമാണെന്നും സാമ്പത്തികമായ ബുദ്ധിമുട്ടുകൾ ഉണ്ടാക്കുമെന്നുൾപ്പടെയുള്ള ആശങ്കകൾ പ്രകടിപ്പിച്ച് തന്റെ ആദ്യ ടേമിൽ H-1B വിസയെ എതിർത്ത ട്രംപ് നിരവധി നിയന്ത്രണങ്ങൾ ഏർപ്പെടുത്തിയിരുന്നു. 2016ൽ, ഈ വിസാ പദ്ധതിയെ ട്രംപ് അപലപിക്കുകയും ചെയ്തു. അമേരിക്കൻ തൊഴിലാളികളെ നിയമിക്കുന്നതിന് പകരം കുറഞ്ഞ ശമ്പളത്തിൽ വിദേശ പൗരന്മാരെ ജീവനക്കാരായി നിയമിക്കാൻ കമ്പനികൾ ഉപയോഗിക്കുന്ന മാർഗമാണ് H-1B വിസയെന്ന് ട്രംപ് അഭിപ്രായപ്പെട്ടു.

എന്നാലിപ്പോൾ മസ്കും വിവേക് രാമസ്വാമിയും ഉൾപ്പടെയുള്ളവർ പദ്ധതിയെ അനുകൂലിച്ച് രം​ഗത്തെത്തി. ഉത്പാദന രംഗത്തെ കാര്യക്ഷമത വർധിപ്പിക്കുന്നതിന്റെ ഭാഗമായി പദ്ധതിയെ പ്രയോജനപ്പെടുത്താമെന്ന നിർദേശവും ട്രംപിന് ലഭിച്ചു. ഇതോടെയാണ് നിയുക്ത അമേരിക്കൻ പ്രസിഡന്റ് നിലപാട് മാറ്റിയത്.

പ്രൊഫഷണൽ യോഗ്യത നേടിയ വിദേശികളെ ജോലിക്ക് നിയമിക്കാൻ തൊഴിലുടമയ്‌ക്ക് അനുമതി നൽകുന്ന സംവിധാനമാണ് H-1B ബി വിസ. പ്രൊഫഷണൽ യോഗ്യത നേടിയവരും, സമാന യോഗ്യതയുള്ളവർക്കുമാണ് വിസ ലഭിക്കുക.