പാലക്കാട്: പാലക്കാട്ടെ കഞ്ചിക്കോട്ട് ബ്രൂവറിയ്ക്ക് അനുമതി നല്കിയതിനെതിരെ പ്രതിഷേധവുമായി പഞ്ചായത്ത് പ്രസിഡൻ്റ് രേവതി ബാബു. എലപ്പുള്ളിയിൽ ബ്രൂവറി തുടങ്ങാനുള്ള മന്ത്രിസഭാ തീരുമാനം പഞ്ചായത്തിനെ അറിയിക്കാതെയാണ് ഉണ്ടായതെന്നും സർക്കാരിൽ നിന്ന് യാതൊരു അറിയിപ്പും കിട്ടിയിട്ടില്ലെന്നും പഞ്ചായത്ത് പ്രസിഡൻ്റ് രേവതി ബാബു പറഞ്ഞു.
പഞ്ചായത്തിന്റെ അനുമതിയില്ലാതെ പദ്ധതി തുടങ്ങാനാവില്ല. ഇക്കാര്യം പഞ്ചായത്ത് സെക്രട്ടറിയോട് ചോദിച്ചപ്പോൾ ഇതുമായി ബന്ധപ്പെട്ട് അനുമതിക്കായി ഒന്നും ലഭിച്ചിട്ടില്ലെന്നാണ് അറിഞ്ഞത്. എന്നാൽ ആറു മാസം മുമ്പ് വ്യവസായ വകുപ്പിൽ നിന്ന് ഓൺലൈനായി ഇക്കാര്യം ചോദിച്ചിരുന്നുവെന്നും നാട്ടുകാരുടെ പരാതി ലഭിച്ചിട്ടുണ്ടോ എന്ന് ഓൺലൈൻ യോഗത്തിൽ ചോദിച്ചിരുന്നുവെന്നും സെക്രട്ടറി പറഞ്ഞിരുന്നു.എന്നാൽ വ്യവസായ വകുപ്പ് മുഖേന ലൈസൻസ് എടുത്ത് ചെയ്യുമ്പോൾ ഓട്ടോമാറ്റിക്കയി അനുമതി ലഭിക്കും. 3 വർഷത്തിനകം പഞ്ചായത്തിൽ രജിസ്റ്റർ ചെയ്താൽ മതിയെന്നാണ് അറിവെന്നും പഞ്ചായത്ത് പ്രസിഡൻ്റ് പറയുന്നു.
ബ്രൂവറിക്കായി അനുമതി നൽകിയത് അതീവ ജല ദൗർബല്യമുള്ള മേഖലയിലാണെന്നു അന്വേഷണത്തിൽ വ്യക്തമായി. മേഖലയിൽ കുഴൽക്കിണറിൽ പോലും വെള്ളം കിട്ടാറില്ലെന്ന് പ്രദേശവാസികൾ ജനം ടിവിയോട് പറഞ്ഞു. 2023 ജൂണിലാണ് എലപ്പുള്ളി പഞ്ചായത്തിലെ ആറാം വാർഡായ മണ്ണക്കാട്ടിൽ 24 ഏക്കറിൽ സംരംഭം ആരംഭിക്കാൻ ഒയാസിസ് കമ്പനി ജില്ലാ വ്യവസായ കേന്ദ്രത്തെ സമീപിച്ചത്.
പദ്ധതി വരുന്നത് നാട്ടുകാരെ ബാധിക്കുന്ന പ്രശ്നമാണ്. കൃഷിക്ക് വെള്ളം കിട്ടാതെ കനാൽ വെള്ളത്തെ ആശ്രയിച്ചാണ് കൃഷി നടത്തുന്നത്. ഗ്രൗണ്ട് വാട്ടർ ലെവൽ കുറയുകയാണെങ്കിൽ ഇത് പഞ്ചായത്തിനെ തന്നെ കുടിവെള്ള ക്ഷാമത്തിലേക്ക് നയിക്കും. പാരിസ്ഥിതിക ആഘാതങ്ങൾ സൃഷ്ടിക്കും. ഇങ്ങനെയൊരു പദ്ധതി ഇവിടെ വേണ്ടെന്നും പഞ്ചായത്ത് പ്രസിഡൻ്റ് പറഞ്ഞു.
600 കോടിയിലേറെ രൂപയുടെ പദ്ധതി ആയതിനാൽ ഏകജാലകം വഴിയാണ് അപേക്ഷ സമർപ്പിച്ചത്. വൻകിട പദ്ധതി എന്ന നിലയിൽ വ്യവസായ വകുപ്പിലെ ഉദ്യോഗസ്ഥർ സ്ഥലം സന്ദർശിച്ചു .എന്നാൽ പിന്നീടുള്ള നീക്കങ്ങളെല്ലാം നടന്നത് തിരുവനന്തപുരവും കൊച്ചിയും കേന്ദ്രീകരിച്ച് ആണെന്നാണ് അറിയുന്നത്.
