തിരുവനന്തപുരം : സർക്കാർ ജീവനക്കാരുടെ ആനുകൂല്യങ്ങൾ നിഷേധിക്കുന്ന ഇടതുസർക്കാർ നടപടിയിൽ പ്രതിഷേധിച്ച് കേരള എൻ. ജി. ഒ. സംഘിന്റെ നേതൃത്വത്തിൽ ജീവനക്കാർ ജനുവരി 24 ന് സെക്രട്ടേറിയറ്റിലേക്ക് മാർച്ച് നടത്തും. ബി.എം.എസ്. സംസ്ഥാന വൈസ് പ്രസിഡന്റ് അഡ്വ. പി. മുരളീധരൻ പ്രതിഷേധം ഉദ്ഘാടനം ചെയ്യും.
2024 ജൂലൈ മുതൽ ലഭ്യമാകേണ്ട പന്ത്രണ്ടാം ശമ്പള പരിഷ്കരണം ഉടൻ നടപ്പിലാക്കുക, കഴിഞ്ഞ മൂന്നു വർഷമായി തടഞ്ഞു വച്ചിരിക്കുന്ന 19 ശതമാനം ക്ഷാമബത്തയും, അനുവദിച്ച 5% ക്ഷാമബത്തയുടെ 39 മാസത്തെ കുടിശികയും അനുവദിക്കുക, 2019 ൽ നടപ്പിലാക്കിയ പതിനൊന്നാം ശമ്പള പരിഷ്കരണത്തിന്റെ കുടിശിക നൽകുക, പങ്കാളിത്ത പെൻഷൻ പിൻവലിച്ച് ഇടതുമുന്നണി സർക്കാർ വാക്കു പാലിക്കുക, മെഡിസെപ് പദ്ധതിയിൽ സർക്കാർ വിഹിതം ഉൾപ്പെടുത്തി പരിഷ്കരിക്കുക തുടങ്ങിയ ആവശ്യങ്ങൾ ഉന്നയിച്ചാണ് പ്രതിഷേധം. രാവിലെ 10.30 ന് മ്യൂസിയം പബ്ലിക് ഓഫീസ് കോമ്പൗണ്ടിൽ നിന്നും മാർച്ച് ആരംഭിക്കുമെന്ന് സംസ്ഥാന പ്രസിഡന്റ് ടി. ദേവാനന്ദൻ, ജനറൽ സെക്രട്ടറി എസ്. രാജേഷ് എന്നിവർ പറഞ്ഞു.
