കോട്ടയം: കോട്ടയം പെരുവ കുന്നപ്പള്ളിയിൽ നിർമ്മാണത്തിലിരിക്കുന്ന ചിപ്പ് നിർമ്മാണ ഫാക്ടറിക്ക് വൻ തീപിടിത്തം. തലയോലപറമ്പ് സ്വദേശിയുടെ ഉടമസ്ഥതയിലുള്ള ‘പി സി ബി എക്സ്പ്രസ്’ എന്ന സ്ഥാപനത്തിലാണ് തീപിടിത്തമുണ്ടായത്.
കമ്പ്യൂട്ടർ ചിപ്പുകളും മദർബോർഡുകളും നിർമ്മിക്കുന്നതിനായി സജ്ജമാക്കിക്കൊണ്ടിരുന്ന ഫാക്ടറിയിലാണ് അപകടമുണ്ടായത്. എസിയിൽ നിന്നാണ് തീ പടർന്നതെന്നാണ് പ്രാഥമിക നിഗമനം. തീപിടിത്തത്തിന്റെ യഥാർഥ കാരണം സംബന്ധിച്ച് പരിശോധന തുടരുകയാണ്.
ഡിസംബറിൽ ഉദ്ഘാടനം നടത്താൻ നിശ്ചയിച്ചിരുന്ന സ്ഥാപനത്തിലാണ് തീപിടിത്തമുണ്ടായത്. ഫാക്ടറി പ്രവർത്തനം ആരംഭിക്കുന്നതിന് മുന്നോടിയായി വിവിധ സജ്ജീകരണങ്ങളും നിർമ്മാണ പ്രവർത്തനങ്ങളും പുരോഗമിക്കുന്നതിനിടെയാണ് അപ്രതീക്ഷിതമായി തീപിടിത്തമുണ്ടായത്.
തീപിടിത്ത വിവരം അറിഞ്ഞ ഉടൻ കടുത്തുരുത്തിയിൽ നിന്ന് ഫയർഫോഴ്സ് സംഘം സ്ഥലത്തെത്തി. തീ നിയന്ത്രണവിധേയമാക്കുന്നതിനുള്ള ശ്രമങ്ങൾ തുടരുകയാണ്. തീ കൂടുതൽ ഭാഗങ്ങളിലേക്ക് പടരാതിരിക്കാനുള്ള നടപടികളും ഫയർഫോഴ്സ് സ്വീകരിക്കുന്നുണ്ട്.
ഫാക്ടറിയിൽ സൂക്ഷിച്ചിരുന്ന ഉപകരണങ്ങൾക്കും മറ്റ് സാമഗ്രികൾക്കും തീപിടിത്തത്തിൽ നാശനഷ്ടമുണ്ടായിട്ടുണ്ടോയെന്നത് സംബന്ധിച്ച് കൂടുതൽ വിവരങ്ങൾ ലഭ്യമായിട്ടില്ല. തീ പൂർണമായും അണച്ചശേഷം മാത്രമേ നാശനഷ്ടത്തിന്റെ വ്യാപ്തി വ്യക്തമാകൂ.
