ലോകത്തിൽ തന്നെ ആദ്യമെന്ന് വിശേഷിപ്പിക്കാം. കേൾക്കുന്ന ആരെയും അമ്പരിപ്പിച്ചിരിക്കുകയാണ് ചെന്നൈ മെട്രോ. ഒരൊറ്റ തൂണിൽ അഞ്ച് റെയിൽപ്പാളങ്ങളാണ് നിർമിച്ചിരിക്കുന്നത്. നഗരത്തിലെ മെട്രോ റെയിൽ നെറ്റ്വർക്ക് വികസിപ്പിക്കുന്നതിന്റെ ഭാഗമായാണ് നൂതന എഞ്ചിനീയറിംഗ് വിസ്മയം.
ചെന്നൈ മെട്രോയുടെ രണ്ടാം ഘട്ടത്തിൽ പോരൂർ മുതൽ ആഴ്വാർതിരുനഗർ വരെയുള്ള നാല് കിലോമീറ്റർ ഭാഗത്താണ് ഇത്. ഭൂനിരപ്പിൽ നിന്ന് ഉയർന്ന് നിൽക്കുന്ന നാല്, അഞ്ച് പാതകൾ പോരൂർ മുതൽ ആഴ്വാർതിരുനഗർ വരെയുള്ള അഞ്ച് സ്റ്റേഷനുകൾ പങ്കുവയ്ക്കും. സ്ഥലപരിമിതിയാണ് ഇത്തരമൊരു അത്ഭുതത്തിലേക്ക് വഴിവച്ചത്. നാല് കിലോമീറ്റർ ഭാഗത്തെ പാതകളായിരിക്കും ഒറ്റത്തൂണിൽ രണ്ട് തട്ടുകളായി ഒരുക്കുക. താഴെ ആയിരിക്കും സ്റ്റേഷനുകൾ.
രണ്ടാം നിലയിൽ നാലാം പാതയിലെ രണ്ട് പാളങ്ങളും മൂന്നാം നിലയിൽ അഞ്ചാം പാതയിലെ രണ്ട് പാളങ്ങളും ഉണ്ടാകും. അറ്റകുറ്റപ്പണികൾക്കുള്ള ലൂപ് ലൊനായിരിക്കും നടുവിൽ. സ്റ്റേഷനുകളും പാതകളും ലിഫ്റ്റും എസ്കലേറ്ററും വഴി ബന്ധിപ്പിക്കും. ഇതിന്റെ നിർമാണം അടുത്ത വർഷത്തോടെ പൂർത്തിയാക്കുമെന്നാണ് വിലയിരുത്തൽ.
