റേസിംഗ് പരിശീലനത്തിനിടെ നടൻ അജിതിന്റെ വാഹനം അപകടത്തിൽപെട്ടു. ഹൈ സ്പീഡ് പരിശീലന സെഷനിലാണ് അപകടമുണ്ടായത്. അജിത് ഓടിച്ചിരുന്ന വാഹനം ഭാഗികമായി തകർന്നു. പോർച്ചുഗലിലെ എസ്റ്റോറിൽ നടക്കുന്ന പ്രധാന മോട്ടോർ സ്പോർട്സ് ഇവന്റിലെ റേസിംഗിന് വേണ്ടിയുള്ള തയാറെടുപ്പിലായിരുന്നു താരം.
അപകടത്തിൽ നിന്ന് അത്ഭുതകരമായാണ് അജിത് രക്ഷപ്പെട്ടതെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു. അപകടവാർത്തയെ കുറിച്ച് അജിത് തന്നെയാണ് ആരാധകരുമായി പങ്കുവച്ചത്. ചെറിയ അപകടമുണ്ടായിയെന്നും പക്ഷേ, എല്ലാവരും സുരക്ഷിതരാണെന്നും അജിത് പറഞ്ഞു. തനിക്ക് ആരാധകർ നൽകുന്ന സ്നേഹത്തിനും പിന്തുണക്കും ഹൃദയംഗമമായ നന്ദി. വരുന്ന കാർ റേസിംഗിലും നമ്മൾ വിജയിക്കും. കൂടെ നിൽക്കുന്ന സുഹൃത്തുക്കൾക്കും കുടുംബത്തിനും നന്ദിയെന്നുമായിരുന്നു അജിതിന്റെ വാക്കുകൾ.
ഇത് രണ്ടാം തവണയാണ് റേസിംഗിനിടെ അജിത് അപകടത്തിൽപെടുന്നത്. നേരത്തെ ദുബായിൽ നടന്ന 24H റേസിംഗ് മത്സരത്തിനായുള്ള പരിശീലനത്തിനിടെ അപകടമുണ്ടായിരുന്നു. കാറിന്റെ നിയന്ത്രണംവിട്ട് ബൗണ്ടറിയിൽ ഇടിക്കുകയായിരുന്നു.
മഗിഴ് തിരുമേനി സംവിധാനം ചെയ്ത വിടാമുയർച്ചിയാണ് അജിത് നായകനായി ഒടുവിൽ പുറത്തിറങ്ങിയ ചിത്രം. ആരാധകർ പ്രതീക്ഷയോടെ കാത്തിരുന്ന ചിത്രം തിയേറ്ററിൽ മികച്ച പ്രതികരണം നേടി പ്രദർശനം തുടരുകയാണ്.
