സുനിതയെയും സംഘത്തെയും വരവേറ്റ നീലക്കടൽ; ഡ്രാ​ഗൺ പേടകത്തിന് ചുറ്റും തുള്ളിച്ചാടിയ ഡോൾഫിനുകൾ, അത്യപൂർവ്വ കാഴ്ചയ്‌ക്ക് സാക്ഷിയായി ലോകം, വീഡിയോ

അന്താരാഷ്‌ട്ര ബഹിരാകാശനിലയത്തെ ഒമ്പത് മാസക്കാലം നീണ്ട ദൗത്യത്തിന് ശേഷം ഭൂമിയിലെത്തിയ സുനിത വില്യംസിനെയും സംഘത്തെയും വരവേറ്റ് ഡോൾഫിനുകളും. മെക്സിക്കോ ഉൾക്കടലിലേക്ക് പതിച്ച ഡ്രാ​ഗൺ ഫ്രീഡം പേടകത്തിന് ചുറ്റും ഡോൾഫിനുകൾ തുള്ളിച്ചാടിയ കാഴ്ച ഏവരെയും അത്ഭുതപ്പെടുത്തി. പുലർച്ചെ 3.30ന് കടലിലിറങ്ങിയ പേടകത്തെ വലംവയ്‌ക്കുന്ന ഡോൾഫിനുകളുടെ അത്യപൂർവ്വ നിമിഷത്തിനാണ് ലോകം ഇന്ന് സാക്ഷിയായത്.

The unplanned welcome crew!

Crew-9 had some surprise visitors after splashing down this afternoon.🐬 pic.twitter.com/yuOxtTsSLV

— NASA’s Johnson Space Center (@NASA_Johnson) March 18, 2025

ഓളംവെട്ടുന്ന നീലക്കടലും ഒപ്പം ഡോൾഫിനുകളുടെ തുള്ളിച്ചാട്ടവുമൊക്കെ പകർത്തിയ വീഡിയോ നാസയുടെ ഔദ്യോ​ഗിക എക്സ് അക്കൗണ്ടിലൂടെ പുറത്തുവിട്ടു. ലോകം മുഴുവൻ സുനിതയെയും സംഘത്തെയും സ്വാ​ഗതം ചെയ്യാൻ ഒത്തുകൂടിയത് പോലെ പ്രകൃതിയും ജീവജാലങ്ങളുമെല്ലാം അവരെ ഭൂമിയിലേക്ക് വരവേറ്റു. ബഹിരാകാശ യാത്രികരെ ഓരോരുത്തരെയായി പുറത്തിറക്കിയപ്പോഴും ഡോൾഫിനുകളുടെ വലംവയ്പ്പ് തുടർന്നിരുന്നു. ഇതിന്റെ വീഡിയോ സമൂഹമാദ്ധ്യമങ്ങളിൽ ശ്രദ്ധേയമാവുകയാണ്.

ഡ്രാ​ഗൺ പേടകം ലാൻഡ് ചെയ്തത് മുതൽ അവരെ റിക്കവറി കപ്പലിലേക്ക് മാറ്റുന്നത് വരെയുള്ള തത്സമയ ദൃശ്യങ്ങൾ നാസ എക്സിൽ പങ്കുവച്ചിരുന്നു. 3.30 ഓടെയാണ് ലാൻഡിം​ഗ് നടന്നത്. സുനിത വില്യംസ്, ബുച്ച് വിൽമോർ, നിക്ക് ​ഹേ​ഗ്, അലക്സാണ്ടർ എന്നിവരെ വൈദ്യപരിശോധനയ്‌ക്ക് വിധേയമാക്കിയിട്ടുണ്ട്.