ഐപിഎൽ 18-ാം സീസണിന്റെ ചാമ്പ്യനെ അറിയാൻ ഇനി മണിക്കൂറുകൾ മാത്രമാണുള്ളത്. പഞ്ചാബ് കിംഗ്സും റോയൽ ചലഞ്ചേഴ്സ് ബെംഗളൂരുവും ഏറ്റുമുട്ടുമ്പോൾ ഒരു പുതിയ ചാമ്പ്യനെയാകും ലഭിക്കുക. ആരു ജയിക്കുമെന്ന കാര്യത്തിൽ ചർച്ചകളും വിലയിരുത്തലുകളും നിരവധിയാണ്. ഇതിനിടെ താൻ ആരെ പിന്തുണയ്ക്കുന്നു എന്ന് വ്യക്തമാക്കിയിരിക്കുകയാണ് മുൻ ഇന്ത്യൻ താരം വിരേന്ദർ സെവാഗ്. ആ പിന്തുണയ്ക്ക് പിന്നിൽ ഒരു കൗതുകരമായ കാര്യവുമുണ്ട്. താൻ ആരെ പിന്തുണച്ചാലും ആ ടീം തോൽക്കുമെന്നാണ് സെവാഗിന്റെ വാദം. ഇന്ത്യൻ ടീം വരെ അങ്ങനെ തോറ്റുപോയെന്നാണ് സെവാഗ് പറയുന്നത്.ക്രിക് ബസിനോട് സംസാരിക്കുമ്പോഴാണ് താരത്തിന്റെ പരാമർശം.
“എന്നെ സംബന്ധിച്ച് ആർ.സി.ബി ജയിക്കണം. അതുകാെണ്ട് എനിക്ക് എന്റെ പഴയ ഫോർമുലയിലേക്ക് മടങ്ങിപോകണം. കാരണം ഞാൻ ആരെ സപ്പോർട്ട് ചെയ്യുന്നോ അവർ തോൽക്കും. ഗുജറാത്ത് മുംബൈക്ക് എതിരെ തോറ്റു. ക്വാളിഫയർ ഒന്നിൽ പഞ്ചാബിന് ആർ.സി.ബിയെ മറികടക്കാനായില്ല. ക്വാളിഫയർ രണ്ടിൽ ഞാൻ മുംബൈ പിന്തുണച്ചിരുന്നു, എന്നാൽ അവർ തോറ്റു. ഇതേ സംഭവം തന്നെയാണ് ഇന്ത്യൻ ടീമിനെ പിന്തുണച്ചപ്പോഴുമുണ്ടായത്”. ആരാണ് നിങ്ങളുടെ ഫൈനലിലെ ഫേവറൈറ്റ് എന്ന ചോദ്യത്തിന് ഒരു കള്ളച്ചിരിയോടെ ആർ.സി.ബിയുടെ പേരാണ് താരം പറഞ്ഞത്.
