തൃശൂര്: ഗുരുവായൂര് ദേവസ്വം ബോര്ഡിന്റെ ഡയറികള് അച്ചടിക്കുകയും വിതരണം ചെയ്യുകയും ചെയ്തതിലും ലക്ഷങ്ങളുടെ ക്രമക്കേട്. ഡയറി വിതരണം കാര്യക്ഷമമായി നടത്താതെ ഉണ്ടായ വീഴ്ചകളെ തുടര്ന്ന് ₹9,35,784 രൂപയുടെ സാമ്പത്തികനഷ്ടം സംഭവിച്ചതായി ഓഡിറ്റ് റിപ്പോര്ട്ട് വെളിപ്പെടുത്തുന്നു.
2020-ലെ പുതുവര്ഷത്തോടനുബന്ധിച്ച് 11,242 ഡയറികള് അധികമായി അച്ചടിച്ചതാണ് പ്രധാന നഷ്ടകാരണം. ഓരോ ഡയറിക്കും ₹83.24 നിരക്കിലാണ് അച്ചടിച്ചിരിക്കുന്നത്.
2020 ഫെബ്രുവരി 10-നാണ് ഡയറികളുടെ കൂടുതൽ എണ്ണവും അച്ചടിച്ച് ലഭ്യമായത്. വില്പനയ്ക്കുമുമ്പ് തന്നെ ഇത്രയും വലിയ തോതില് ഡയറികള് അച്ചടിച്ചത് ഭരണസമിതിയുടെ കണക്കുകൂട്ടലിലെ പിഴവാണെന്ന് ഓഡിറ്റ് റിപ്പോര്ട്ട് വ്യക്തമാക്കുന്നു.
കൂടാതെ, 16,789 ഡയറികള് (ആകെ മൂല്യം ₹19,97,891) പദവിയിലുള്ളവര്ക്ക്, അംഗങ്ങള്ക്കും അഡ്മിനിസ്ട്രേറ്റീവ് സ്റ്റാഫിനും സൗജന്യമായി വിതരണം ചെയ്തതായി രജിസ്റ്റര് രേഖകള് വ്യക്തമാക്കുന്നു. മുന്വര്ഷം 750 എണ്ണം മാത്രമായിരുന്നു സൗജന്യ വിതരണം.
ഡയറികളുടെ അമിത അച്ചടിയും നിയന്ത്രണരഹിതമായ സൗജന്യ വിതരണവും മൂലം ദേവസ്വത്തിനു വലിയ സാമ്പത്തിക നഷ്ടമാണ് സംഭവിച്ചത്. ഭരണസമിതി എടുത്ത തെറ്റായ തീരുമാനങ്ങളാണ് ഇതിന് പിന്നിലെന്നാണ് ഓഡിറ്റ് റിപ്പോര്ട്ട് വിലയിരുത്തല്. നഷ്ടമായ തുക ഭരണസമിതി അംഗങ്ങളില് നിന്ന് ഈടാക്കാന് നടപടി സ്വീകരിക്കണമെന്ന് ഓഡിറ്റ് റിപ്പോര്ട്ടില് നിര്ദ്ദേശിച്ചിട്ടുണ്ട്.
