ന്യൂഡൽഹി: യുകെ ആസ്ഥാനമായുള്ള വിവാദ പ്രതിരോധ ഇടപാടുകാരൻ സഞ്ജയ് ഭണ്ഡാരിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ റോബർട്ട് വാദ്രയ്ക്കെതിരെ എൻഫോഴ്സ്മെന്റ് ഡയറക്ടറേറ്റ് കുറ്റപത്രം സമർപ്പിച്ചു. ഡൽഹിയിലെ റൗസ് അവന്യൂ കോടതിയിലാണ് കുറ്റപത്രം സമർപ്പിച്ചിരിക്കുന്നത്.
സഞ്ജയ് ഭണ്ഡാരിയുമായി വാദ്രയ്ക്ക് അടുത്ത ബന്ധമുണ്ട്. ജൂലൈയിൽ പിഎംഎൽഎ നിയമപ്രകാരം അഞ്ച് മണിക്കൂറിലധികം ഇഡി വാദ്രയെ ചോദ്യം ചെയ്തിരുന്നു. വയനാട് എംപിയായ ഭാര്യ പ്രിയങ്ക വാദ്രയും അന്ന് ഇഡിയുടെ ഓഫീസിൽ എത്തിയിരുന്നു. സഞ്ജയ് ഭണ്ഡാരിയുമായി ബന്ധപ്പെട്ട ഇഡിയുടെ ചോദ്യങ്ങൾക്ക് മറുപടി നൽകാൻ വാദ്രയ്ക്ക് കഴിഞ്ഞിരുന്നില്ല.
നിലവിൽ മൂന്ന് കള്ളപ്പണം വെളുപ്പിക്കൽ കേസുകളിലാണ് വാദ്ര അന്വേഷണം നേരിടുന്നത്. 2008 ലെ ഹരിയാന ഭൂമി ഇടപാടുമായി ബന്ധപ്പെട്ട് കഴിഞ്ഞ ഏപ്രിലിൽ മൂന്ന് ദിവസം ഇഡി വാദ്രയെ ചോദ്യം ചെയ്തിരുന്നു. രാജസ്ഥാനിലെ ബിക്കാനീറിലെ ഒരു ഭൂമി ഇടപാടാണ് മറ്റൊന്ന്.
