ന്യൂഡൽഹി : നിതിൻ നബീൻ സിൻഹയെ ബിജെപിയുടെപുതിയ ദേശീയ വർക്കിംഗ് പ്രസിഡന്റായി തെരെഞ്ഞെടുത്തു. 45 വയസുകാരനായ ഇദ്ദേഹം നിലവിൽ ബീഹാറിലെ പിഡബ്ല്യുഡി മന്ത്രിയും പട്നയിലെ ബങ്കിപൂരിൽ നിന്നുള്ള എംഎൽഎയുമാണ്. മുൻ യുവമോർച്ച സെക്രട്ടറി ആയ നിതിൻ നബീൻ നാല് തവണയായി എംഎൽഎ ആണ്. എബിവിപിയിലൂടെ വിദ്യാർത്ഥി രാഷ്ട്രീയത്തിൽ തന്റെ രാഷ്ട്രീയ ജീവിതം ആരംഭിച്ച നിതിൻ 2010 ൽ തന്റെ ആദ്യ നിയമസഭാ തിരഞ്ഞെടുപ്പിൽ വിജയിച്ചു.
മുതിർന്ന ബിജെപി നേതാവ് നബീൻ കിഷോർ സിൻഹയുടെ മകനാണ് നിതിൻ. ഭാരതീയ ജനതാ പാർട്ടിയുടെ പാർലമെന്ററി ബോർഡ് ആണ് ഞായറാഴ്ച നിതിൻ നബിനെ പാർട്ടിയുടെ ദേശീയ വർക്കിംഗ് പ്രസിഡന്റായി നിയമിച്ചത്.
ബിജെപി വർക്കിംഗ് പ്രസിഡന്റായി നിയമിതനായതിന് നിതിനെ പ്രധാനമന്ത്രി മോദി അഭിനന്ദിച്ചു , “സമ്പന്നമായ സംഘടനാ പരിചയവും ബിഹാറിൽ നിരവധി തവണ എംഎൽഎയും മന്ത്രിയും എന്ന നിലയിൽ മികച്ച റെക്കോർഡും ഉള്ള ഒരു ചെറുപ്പക്കാരനും കഠിനാധ്വാനിയും ആയ നേതാവ്” എന്ന് മോദി നിതിനെ വിശേഷിപ്പിച്ചു.”ജനങ്ങളുടെ അഭിലാഷങ്ങൾ നിറവേറ്റുന്നതിനായി അദ്ദേഹം കഠിനാധ്വാനം ചെയ്തിട്ടുണ്ട്. എളിമയുള്ള സ്വഭാവത്തിനും ഉറച്ച പ്രവർത്തന ശൈലിക്കും അദ്ദേഹം പേരുകേട്ടയാളാണ്. അദ്ദേഹത്തിന്റെ ഊർജ്ജവും സമർപ്പണവും വരും കാലങ്ങളിൽ നമ്മുടെ പാർട്ടിയെ ശക്തിപ്പെടുത്തുമെന്ന് എനിക്ക് ഉറപ്പുണ്ട്. ബിജെപി ദേശീയ വർക്കിംഗ് പ്രസിഡന്റായതിന് അദ്ദേഹത്തിന് അഭിനന്ദനങ്ങൾ,” പ്രധാനമന്ത്രി മോദി എക്സിൽ എഴുതി.
