കേരളീയ വിവാഹങ്ങളിൽ ഒഴിച്ച് കൂടാനാകാത്ത സാന്നിധ്യമായി കൈത്തറിവസ്ത്രങ്ങൾ മാറിക്കഴിഞ്ഞു. വധൂവരന്മാർ ധരിക്കുന്ന വസ്ത്രങ്ങൾ മാത്രമല്ല, ബന്ധുമിത്രാദികൾക്ക് ധരിക്കാനുള്ള വസ്ത്രങ്ങളും ഇപ്പോൾ കൈത്തറി വസ്ത്രങ്ങളായി മാറിക്കഴിഞ്ഞു. കേരളത്തിന് സ്വയമേവ വളരെ മികച്ച ഒരു കൈത്തറി പാരമ്പര്യമുണ്ട്. ബാലരാമപുരം കൈത്തറി, കുത്താമ്പുള്ളി കൈത്തറി എന്നിവ പോലെ തന്നെ പ്രാധാന്യമുള്ള മറ്റൊരു കൈത്തറി സമ്പ്രദായമാണ് ചേന്ദമംഗലം കൈത്തറി.
ബാലരാമപുരം കൈത്തറിഗ്രാമം തിരുവനന്തപുരത്താണ്, കുത്താമ്പുള്ളി കൈത്തറിഗ്രാമം പാലക്കാടാണ്. അതേ പോലെ കേരളത്തിന്റെ കൈത്തറി കലാപാരമ്പര്യത്തിന്റെ നീണ്ട പാരമ്പര്യത്തെ പ്രതിഫലിപ്പിക്കുന്ന ചേന്ദമംഗലം, കൈത്തറി നിർമ്മാണത്തിൽ പ്രാവീണ്യമുള്ള കരകൗശല വിദഗ്ധരുടെ ഒരു മനോഹരമായ ഗ്രാമമാണ്. എറണാകുളം ജില്ലയിലാണ് ജിഐ ടാഗിംഗ് ഉള്ള ഈ പുരാതന കൈത്തറി ഗ്രാമം.ചേന്ദമംഗലം കേരളത്തിലെ ഏറ്റവും മികച്ച ഗുണനിലവാരമുള്ള തുണിത്തരങ്ങൾ ഉത്പാദിപ്പിക്കുന്ന ഒരു പ്രദേശമായി കണക്കാക്കപ്പെടുന്നു. ‘സെറ്റ്-മുണ്ട്’, ടു-പീസ് വസ്ത്രം, വിവാഹങ്ങൾക്കുള്ള കസവ് സാരി, ‘തോർത്ത്’ തുടങ്ങിയ ആധികാരിക കേരള വസ്ത്രങ്ങൾ നിർമ്മിക്കുന്നതിൽ ചേന്ദമംഗലം നെയ്ത്തുകാർ വിദഗ്ധരാണ്.
കാലങ്ങളായി പുളിയിലക്കര ബോർഡർ ഉള്ള ചേന്ദമംഗലം സാരികൾ ഇപ്പോൾ കാലികമായ രൂപങ്ങളും ചിത്രങ്ങളും ഉൾപ്പെടുത്തിയാണ് നെയ്തെടുക്കുന്നത്. പുതിയ ടെക്നോളജികൾ ഉപയോഗിച്ചുള്ള ഡിസൈനിങ് സമ്പ്രദായങ്ങൾ ഇന്നത്തെ യുഗവുമായി സമന്വയിപ്പിക്കാൻ നെയ്ത്തുകാരേ സഹായിക്കുന്നു.
പതിനേഴാം നൂറ്റാണ്ട് മുതൽ ദേവാങ് ചെട്ടിയാർ സമൂഹത്തിന്റെ കൈത്തറി കേന്ദ്രമായി ഈ പ്രദേശം അഭിവൃദ്ധി പ്രാപിച്ചിരുന്നു. ഈ വംശത്തിലെ ഒരു വ്യാപാരി രാജാവിന് ഏറ്റവും മികച്ച തുണിത്തരങ്ങൾ സമ്മാനിച്ചതോടെയാണ് ചേന്ദമംഗലം കൈത്തറിയുടെ കഥ പാലിയം കൊട്ടാരത്തിൽ എത്തിയത് . കാലക്രമേണ അത് “ഒരു ബ്രാൻഡായി വളർന്നു”, അതോടെ നൂറുകണക്കിന് ആളുകൾ ഈ വ്യവസായത്തിൽ ജോലി ചെയ്യാൻ തുടങ്ങി.
ചേന്ദമംഗലം പഞ്ചായത്തിലെ കിഴക്കുംപുറം കോറ്റാട്ടാൽ പ്രദേശത്താണ് കൈത്തറി ഗ്രാമം.2022 നവംബറിൽ ഈ ഗ്രാമത്തിനു ശിലയിട്ടു. കൈത്തറിയുടെ വളർച്ചയ്ക്ക് പുതിയ സാദ്ധ്യതകൾ കണ്ടെത്തുക, ലോക ടൂറിസം ഭൂപടത്തിൽ ഇടം നേടുക എന്നീ ലക്ഷ്യങ്ങളോടെയാണ് ഈ പദ്ധതി ആവിഷ്കരിച്ചത്. ചേന്ദമംഗലം ഹാൻസ്, വീവേഴ്സ് യാൺ സംഘങ്ങളുടെ രണ്ട് ഏക്കറോളം വരുന്ന സ്ഥലത്താണ് കൈത്തറിഗ്രാമം നിർമ്മിക്കുന്നത്.
