ആദിത്യ ധർ ചിത്രം ദുരന്ധർ ബോക്സ് ഓഫീസിൽ ജൈത്രയാത്ര തുടരുകയാണ്. ഈ സാഹചര്യത്തിൽ സിനിമയിൽ യാത്രയാരംഭിച്ച ആദ്യനാളുകളിൽ വിശ്വസിച്ച് കൂടെ നിർത്തിയതിന് ഗുരുസ്ഥാനീയനായ പ്രിയദർശനോട് നന്ദി പറഞ്ഞിരിക്കുകയാണ് സംവിധായകൻ ആദിത്യ ധർ.
‘ചലച്ചിത്രകാരൻ എന്ന നിലയിൽ മാത്രമല്ല, ഒരു മനുഷ്യനെന്ന നിലയിലും എന്താണ് ചെയ്യേണ്ടതെന്ന് നിങ്ങൾ എന്നെ കൃത്യമായി പഠിപ്പിച്ചു. ജോലിയെക്കാൾ വളരെ വിലപ്പെട്ടതായി കാണുന്ന അന്തസ്സ്, വിശ്വാസം, സ്നേഹം എന്നിവ എനിക്ക് നൽകി നിങ്ങൾ എന്നെ തുല്യനായി പരിഗണിച്ചു’ ആദിത്യ പങ്കുവെച്ച കുറിപ്പിൽ പറയുന്നു.
ആദിത്യ വർഷങ്ങളായി സിനിമ രംഗത്ത് പിന്നണിയിൽ പ്രവർത്തിക്കുന്നുണ്ട്. അസിസ്റ്റന്റ് ഡയറക്ടറായും ഗാനരചയിതാവുമായാണ് സിനിമയിൽ അദ്ദേഹം തന്റെ കരിയർ ആരംഭിച്ചത്. ഹാൽ-ഇ-ദിൽ, ഡാഡി കൂൾ തുടങ്ങിയ സിനിമകൾക്ക് ഗാനങ്ങൾ രചിച്ചതും ധർ ആയിരുന്നു.
ആക്രോശ്, തേസ് എന്നീ സിനിമകൾക്ക് സംഭാഷണങ്ങൾ എഴുതിയതോടെ ബോളിവുഡിലേക്കുള്ള ചവിട്ടുപടികൾ ആദിത്യ ഓടിക്കയറി. അതിന് കൈ പിടിച്ചുയർത്തിയതോ ചലച്ചിത്ര നിർമ്മാതാവ് പ്രിയദർശനും. ആ രണ്ട്സിനിമകളും അദ്ദേഹത്തിന്റെ കരിയറിലെ നാഴിക കല്ലുകളായിരുന്നു. അന്ന് പ്രിയദർശൻ ഏല്പിച്ച ആ വലിയ ഉത്തരവാദിത്വമാണ് ഇന്ന് ലോകമറിയപ്പെടുന്ന ഒരു സംവിധായകനിലേക്ക് ഉയർത്താൻ പ്രധാനപങ്കുവഹിച്ചതെന്ന് ആദിത്യ നന്ദിയോടെ ഓർക്കുന്നു.
