തിരുവനന്തപുരം : കെഎസ്ആർടിസി ബസിൽ ഇനിമുതൽ ഭക്ഷണവും മുൻകൂട്ടി ബുക്ക് ചെയ്യാനല്ല സൗകര്യങ്ങൾ ഒരുങ്ങുന്നു. യാത്രക്കാർക്ക് പിഎൻആർ നമ്പർ ഉപയോഗിച്ച് മുൻകൂട്ടി ഭക്ഷണം ഓർഡർ ചെയ്യാനുള്ള സൗകര്യമാണ് കെഎസ്ആർടിസി ഒരുക്കുന്നത്. റെയിൽ റോൾസ് സ്റ്റാർട്ടപ് കമ്പനിയുമായി ചേർന്നാണിത് നടപ്പിലാക്കുക. കെഎസ്ആർടിസി ബസിൽ ടിക്കറ്റ് ബുക്ക് ചെയ്യുമ്പോൾ തന്നെ ഭക്ഷണം ഓർഡർ ചെയ്യാനുള്ള ഓപ്ഷനും ഉണ്ടാകും. . സ്റ്റേഷൻ ഒൗട്ട്ലറ്റിൽനിന്ന് വാങ്ങിക്കുകയോ ആവശ്യമെങ്കിൽ നേരിട്ട് സീറ്റിലേക്ക് എത്തിക്കുകയോ ആകും.
നിലവിൽ 10 ഡിപ്പോകളിൽ ഒൗട്ട്ലറ്റ് തുടങ്ങാനുള്ള അനുമതിയാണ് റെയിൽ റോൾസിന് കെഎസ്ആർടിസി നൽകിയത്.ഇതിനായുള്ള ആദ്യ ഒൗട്ട്ലറ്റ് തിരുവനന്തപുരം സെൻട്രൽ ഡിപ്പോയിൽ തുറന്നു. റെയിൽ റോൾസിന്റെ തിരുവനന്തപുരം ഒൗട്ട്ലറ്റിന്റെ ഉദ്ഘാടനം മന്ത്രി കെ ബി ഗണേഷ്കുമാർ നിർവഹിച്ചു. അടുത്ത ദിവസങ്ങളിൽ കൊട്ടാരക്കര, കൊല്ലം, എറണാകുളം ഡിപ്പോകളിലും തുടങ്ങും. ഫെബ്രുവരിയിൽ ആലുവ, ആലപ്പുഴ, കണ്ണൂർ, കാസർകോട്, പാലക്കാട്, കോട്ടയം ഡിപ്പോകളിലും ഒൗട്ട്ലറ്റ് തുടങ്ങും.
ഹൈജീനിക് ആയ ഭക്ഷണം റാപ്പറുകളിലായിരിക്കും. അതിനാൽ സീറ്റോ പരിസരമോ വൃത്തികേടാകില്ല. റാപ്പറുകൾ പൊളിച്ച് എങ്ങനെ ഭക്ഷണം കഴിക്കാമെന്ന് ബസിലെ സ്ക്രീനിൽ വിശദമാക്കും. റാപ്പറുകൾ ബസിനകത്ത് സ്ഥാപിച്ച പ്രത്യേക വേസ്റ്റ് ബിന്നിൽ നിക്ഷേപിക്കണം. എല്ലാത്തരം ബസുകളിലും ഭക്ഷണമെത്തിക്കും.
