ഹൈദരാബാദ്: തിരുപ്പതി ദര്ശനത്തിനെത്തുന്ന ഭക്തരുടെ എണ്ണത്തിലുണ്ടായ വര്ദ്ധനവ് പ്രസാദ വിതരണത്തിലും പ്രതിഫലിക്കുന്നു. മലയോര ക്ഷേത്രത്തിലെ പ്രധാന ആകര്ഷണങ്ങളിലൊന്നായ വിശുദ്ധ ലഡ്ഡുവിന്റെ വിതരണത്തില് കഴിഞ്ഞ മേയ് മാസത്തില് എക്കാലത്തെയും ഉയര്ന്ന നിരക്കാണ് രേഖപ്പെടുത്തിയത്. മുപ്പത്തിയൊന്ന് ദിവസത്തിനുള്ളില് ഒരു കോടി ഇരുപത്തിയൊന്ന് ലക്ഷത്തിലധികം (1,21,35,528) ലഡ്ഡു പ്രസാദമാണ് തിരുമല തിരുപ്പതി ദേവസ്ഥാനം വഴി ഭക്തരിലേക്ക് എത്തിയത്.
കഴിഞ്ഞ ഏതാനും വര്ഷങ്ങളിലെ കണക്കുകളുമായി താരതമ്യം ചെയ്യുമ്പോള് പ്രസാദത്തിനായുള്ള ആവശ്യക്കാരില് വലിയ രീതിയിലുള്ള വര്ദ്ധനവാണ് കാണാനാകുന്നത്. 2024 ല് 1.01 കോടി, 2025ല് 1.10 കോടി 2026 മേയ് 1.21 കോടിയിലധികം ലഡ്ഡു എന്നാണ് കണക്ക്. മുന്വര്ഷങ്ങളിലെ റെക്കോര്ഡുകളെല്ലാം കാറ്റില്പ്പറത്തിക്കൊണ്ടാണ് ഈ വര്ഷത്തെ കുതിപ്പ്.
ഭക്തരുടെ വലിയ തോതിലുള്ള ആവശ്യകത തടസ്സമില്ലാതെ നിറവേറ്റുന്നതിനായി ക്ഷേത്രത്തിലെ നിര്മ്മാണ ശാലയായ ‘പൊട്ടു’വില് വന് ക്രമീകരണങ്ങളാണ് അധികൃതര് ഏര്പ്പെടുത്തിയിട്ടുള്ളത്. നിലവില് ഓരോ ദിവസവും നാല് ലക്ഷത്തിലധികം ലഡ്ഡുക്കളാണ് ഇവിടെ തത്സമയം തയ്യാറാക്കുന്നത്. ഇതിനായി ഭീമമായ അളവിലുള്ള ഗുണനിലവാരമുള്ള ചേരുവകളാണ് ഓരോ ദിവസവും ഉപയോഗിക്കുന്നത്. ഒരു ലഡ്ഡു നിര്മ്മിക്കുന്നതിനായി ഏകദേശം 170 ഗ്രാം മിശ്രിതം ആവശ്യമായി വരുന്നുണ്ട്.
ഇതില് 32 ടണ് പഞ്ചസാര, 16 ടണ് കടലമാവ്, 16 ടണ് നെയ്യ് എന്നിവ ഉള്പ്പെടുന്നു. ഒരു ലഡ്ഡു നിര്മ്മിക്കാന് മാത്രം ഏകദേശം 170 ഗ്രാം സാമഗ്രികള് ആവശ്യമാണ്. ഭക്തര്ക്ക് ലഡ്ഡു വിതരണം സുഗമമാക്കുന്നതിനായി ക്ഷേത്രവളപ്പില് ആകെ 56 ലഡ്ഡു കൗണ്ടറുകളാണ് നിലവില് സജ്ജമാക്കിയിരിക്കുന്നത്.
