തിരുവനന്തപുരം: വണ്ടാനം മെഡിക്കല് കോളേജില് ശസ്ത്രക്രിയയ്ക്കിടെ വയറ്റില് കത്രിക കുടുങ്ങിയ സംഭവത്തിൽ പ്രതിഷേധവുമായി യൂത്ത് കോണ്ഗ്രസ് പ്രവര്ത്തകർ. ആരോഗ്യ വകുപ്പുമന്ത്രി വീണാ ജോര്ജ്ജിന്റെ ഔദ്യോഗിക വസതിയില് റീത്ത് വെച്ചായിരുന്നു പ്രതിഷേധം സംഘടിപ്പിച്ചത്. ഇന്ന് രാവിലെയായിരുന്നു സംഭവം.
ശാസ്ത്രക്രിയയ്ക്കിടയിൽ സംഭവിച്ച വീഴ്ച സമൂഹത്തിൽ വലിയ ചർച്ചയായിരിക്കുകയാണ്. ഇതിനിടെയാണ് യൂത്ത് കോണ്ഗ്രസ് പ്രവര്ത്തകർ മന്ത്രിയുടെ ഔദ്യോഗിക വസതിയുടെ ഗേറ്റ് തള്ളിതുറന്ന് കടന്ന് വീടിനുമുന്നില് റീത്ത് വെച്ചത്. അതിരാവിലെയായതിനാലാണ് കാര്യമായ സുരക്ഷാ ഒരുക്കങ്ങള് ഇല്ലാതിരുന്നത് എന്നാണ് സുരക്ഷാ ഉദ്യോഗസ്ഥരുടെ വാദം. പോലീസ് കമ്മിഷണറുടെ ഓഫീസിന് സമീമാണ് മന്ത്രിയുടെ വസതി. എന്നിട്ടും ഇത്തരത്തിൽ വീഴ്ച സംഭവിച്ചത് ആഭ്യന്തര വകുപ്പിന്റെയും പോലീസിന്റെയും വന് പരാജയമാണ് ചൂണ്ടി കാണിക്കുന്നത്.
ആരോഗ്യരംഗത്ത് തുടർച്ചയായി ഇത്തരം വീഴ്ചകൾ സംഭവിക്കുന്നത് വകുപ്പ് മന്ത്രിയുടെ അനാസ്ഥയാണെന്നും വീണാ ജോര്ജ് ആരോഗ്യമന്ത്രി സ്ഥാനത്തുനിന്നും രാജി വെക്കണമെന്നുമുള്ള ആവശ്യങ്ങൾ വ്യാപകമാകുന്നുണ്ട്.
