തിരുവനനന്തപുരം: ആറ്റുകാൽ പൊങ്കാല പ്രമാണിച്ച് ജലവിതരണം സംബന്ധിച്ച ആവശ്യങ്ങൾക്ക് പൊതുജനങ്ങൾക്ക് ബന്ധപ്പെടുന്നതിനായി കേരള വാട്ടർ അതോറിറ്റി കൺട്രോൾ റൂം തുറന്നു. ബന്ധപ്പെടേണ്ട നമ്പർ- 9188127947.
പൊങ്കാലയോടനുബന്ധിച്ച് ശുദ്ധജലവിതരണം ഉറപ്പുവരുത്തുവാനും മലിനജല നിർമ്മാർജന പ്രവർത്തനങ്ങൾ സംബന്ധിച്ച പരാതിപരിഹാരത്തിനും വിതരണം ചെയ്യുന്ന ജലത്തിന്റെ ഗുണനിലവാരം ഉറപ്പുവരുത്തുന്നതിനും വാട്ടർ അതോറിറ്റിയുടെ നേതൃത്വത്തിൽ വിപുലമായ ക്രമീകരണങ്ങളും ഏർപ്പെടുത്തിയിട്ടുണ്ട്.
പൊങ്കാല മേഖലകളിൽ പുതുതായി 1550 താൽക്കാലിക കുടിവെള്ള ടാപ്പുകളും ആറ്റുകാൽ മേഖലയിലെ കുളിക്കടവുകളോട് അനുബന്ധിച്ച് 50 ഷവറുകളും സ്ഥാപിക്കുന്നതാണ്. ഫയർഫോഴ്സ് അധികൃതരുടെ ആവശ്യപ്രകാരം 23 ഫയർഹൈഡ്രന്റുകളും സജ്ജമാക്കും.
ആവശ്യമുള്ള പ്രദേശങ്ങളിൽ ടാങ്കർ ലോറിയുടെ സേവനവും ലഭ്യമാക്കും. പൊങ്കാല പ്രദേശങ്ങളെ ആറ്റുകാൽ, ഫോർട്ട്- ചാല, ശ്രീവരാഹം എന്നിങ്ങനെ മൂന്നു മേഖലകളായി തിരിച്ച് അറ്റകുറ്റപ്പണികൾ ആവശ്യമായ ഇടങ്ങളിൽ അടിയന്തരമായി നടത്തുന്നതിനായി പ്രത്യേക സംഘങ്ങളെ നിയോഗിച്ചിട്ടുണ്ട്. കൂടാതെ വാട്ടർ അതോറിറ്റി ബ്ലൂ ബ്രിഗേഡിന്റെ പ്രവർത്തനം 24 മണിക്കൂറും ഉറപ്പുവരുത്തിയിട്ടുണ്ട്.
നഗരത്തിലെ സീവർ ലൈൻ ശൃംഖല പ്രത്യേകമായി മേഖല തിരിച്ച് ബക്കറ്റ് ക്ലീനിങ്, ജെറ്റിംഗ് എന്നിവ നടത്തി സുഗമമായ ഒഴുക്ക് സാധ്യമാക്കിയിട്ടുണ്ട്. ഇതിനായി 31 പ്രത്യേക പ്രവൃത്തികൾ നടക്കുന്നുണ്ട്. സീവറേജ് സംബന്ധമായ പരാതികൾ കൈകാര്യം ചെയ്യുന്നതിനായും പ്രത്യേക സംഘങ്ങളെ ഏർപ്പെടുത്തിയിട്ടുണ്ട്. വിതരണം ചെയ്യുന്ന കുടിവെള്ളത്തിന്റെ ഗുണനിലവാര പരിശോധന നടത്തുന്നതിനായി വാട്ടർ അതോറിറ്റി ക്വാളിറ്റി കൺട്രോൾ വിഭാഗത്തിന്റെ നേതൃത്വത്തിൽ പൊങ്കാല കഴിയുന്നത് വരെ പ്രത്യേക സംഘങ്ങളെ ചുമതലപ്പെടുത്തിയിട്ടുണ്ട്.
